Орхон аймгийн Хүүхэд, залуучуудын театрын бүтээл “Хөх төрийн бэрс” түүхэн жүжгийг энэ сарын 25-нд УДЭТ-ын тайзнаа тоглох гэж байна. Монгол төрийн “Мэргэн сайд” хэмээгддэг Агданбуугийн Амарын түүхэн замналаас сэдэвлэсэн эл жүжгийн зохиолыг Б.Цогнэмэх бичиж, Урлагийн гавьяат зүтгэлтэн Е.Баярмагнай найруулжээ. Түүхийн зөвлөхөөр түүхийн ухаан доктор Ё.Отгонбаяр, зөвлөх найруулагчаар Төрийн соёрхолт, Урлагийн гавьяат зүтгэлтэн Н.Наранбаатар, хөгжмийн зохиолчоор Урлагийн гавьяат зүтгэлтэн Б.Бат-эрдэнэ, ерөнхий зураачаар Д.Цогт нар ажилласан байна. Гол дүрүүдэд Н.Пүрэвдорж, П.Мөнхцэцэг нарын жүжигчид тогложээ.
Монгол төрийн “Мэргэн сайд” хэмээгддэг тулхтай төрийн зүтгэлтэн Агданбуугийн Амар 1886 онд одоогийн Булган аймгийн Бугат сумын Маалийн ам хэмээх газар төржээ. Тэрбээр 1928 оны хоёрдугаар сарын 21-ээс 1930 оны дөрөвдүгээр сарын 27 хүртэл Монгол Улсын Ерөнхий сайд, 1934 оны долдугаар сарын 2-оос 1936 оны гуравдугаар сарын 22 хүртэл Улсын бага хурлын Тэргүүлэгчдийн дарга, 1936 оны гуравдугаар сарын 22-оос 1939 оны гуравдугаар сарын 7-ны хооронд дахин Ерөнхий сайдаар тус тус ажиллаж байв. 1939 оны гуравдугаар сард баривчлагдаж, Зөвлөлт Холбоот Улсад (ЗХУ) хүргэгдэж, 1941 оны долдугаар сарын 10-нд Москва хот орчим цаазаар авахуулжээ. Түүний шарил өнөөг хүртэл олдоогүй бөгөөд энэхүү уран бүтээл нь Хөх Монголын төрийн бэрс А.Амарт зориулсан гэрэлт хөшөө юм.
