“VOO”-гээс дараагийн уран бүтээлээ үзэгчдэд хүргэж байна. “Өс залгамжлагч” нэртэй энэхүү уран бүтээл нь халаасны кино гэдгээрээ онцлог. Тодруулбал, өдөр тутмын амьдралд халааснаасаа гар утсаа гарган, богино хугацаанд ямар нэгэн сонирхолтой зүйл үзэх боломжийг халаасны кино олгож буй. Халаасны кино нь үзэгчдэд хамгийн ачаалалтай, богино хугацаанд, тухлах боломжтой бүх орчинд үзэхэд тохиромжтой. Босоо форматаар бүтээгдсэн бөгөөд нэг анги нь ердөө 1-2 минутын урттай тул үзэгчдийн цагийг хэт зарцуулалгүйгээр, сэтгэлд хоногшихуйц мэдрэмж төрүүлэх юм.
“Өс залгамжлагч” халаасны киноны үйл явдал “G&G” группийн өв залгамжлагч Гэгээ нөхөртөө хууртагдсаны улмаас гэр бүлээ цуцлуулахаар хуулийн фирмд хандаж буйгаар эхэлнэ. Тус хуулийн фирмийн шинэ гүйцэтгэх захирлаар түүний анхны хайр Очир томилогдсон байв. Гэгээгийн нөхөр Баттулга өв хөрөнгийг зүгээр нэг тавьж явуулахыг хүссэнгүй. Шүүхэд хандаад удаагүй байх үедээ Гэгээ авто осолд орох бөгөөд үүнийг хэн зохион байгуулсанг мэдэх, мөн өөрийн эцгийн босгосон компанийн хуучин нөхөртөө алдахыг хүсээгүй Гэгээ өмгөөлөгч Очиртой хамт Баттулгын эсрэг тэмцэх явцдаа эцгийнхээ тухай аймшигт үнэнг мэдэх болно.
Нийт 80 ангитай “Өс залгамжлагч” цувралын эхний 20 анги нь “VOO”-д байршсан байгаа бөгөөд долоо хоног бүрийн даваа гарагт 10 анги нэмэгдэн орох аж.
