“Фантастик” продакшны найруулагч Б.Тамир дараагийн уран бүтээлдээ “Цөвүүн цаг” нэртэйгээр хүргэх гэж байна. Энэхүү уран бүтээлийг тэрбээр аавтайгаа хамт буюу Гавьяат жүжигчин, найруулагч О.Бат-Өлзийн хамт найруулжээ. Тус киноны зураг авалтыг өнгөрсөн долдугаар сард Өмнөговь аймагт авч гүйцэтгэсэн аж.
Ташрамд дурдахад, Б.Тамир өнгөрсөн хугацаанд дэлгэцийн 20 шахам уран бүтээлийг найруулж, үзэгч олонд толилуулжээ. Хамгийн сүүлд “Зура”, “Зура-2: Цурам ажиллагаа”, “Зура-3: Цэвэрлэгээ” уран сайхны киног хүргэсэн нь 2017 оноос өнөөдрийг хүртэлх хамгийн шилдэг борлуулалттай кинонуудын жагсаалтыг тэргүүлээд буй.
“In da house-3: Korea” /2025.03.06/
Жүжигчин Н.Баясаа, С.Батзориг, Г.Лхагвацэрэн, У.Цогтбаяр, Р.Сүхболд нарын бүтээлчид хамтран “In da house” адал явдалт, инээдмийн уран сайхны киног 2021 онд үзэгчдэд хүргэж байв. Түүнчлэн 2022 онд найруулагч Ц.Амартүвшингийн найруулгаар “In da house: Come back” киног үргэлжлүүлэн бүтээж, олонд хүргэсэн юм. Тэгвэл “In da house-3: Korea” киног БНСУ-ийн уран бүтээлчидтэй хамтран бүтээжээ. Энэ удаа өмнөх хоёр ангид тоглосон Монголын жүжигчдээс гадна Солонгосын А зэрэглэлийн жүжигчид болох Ги Жү Бун, Юн Жэ Мүн нарын алдартай уран бүтээлчид тоглосон байна.
“Аминч” /2025.03.07/
“Хувьсал” продакшн дэлгэцийн ес дэх уран бүтээлээ “Аминч” нэртэйгээр үзэгчдийн хүртээл болгох гэж байна. “Team Hero”-тэй хамтран бүтээсэн эл уран бүтээлийн зохиолыг Г.Бямбасүрэн, Б.Баатар нар хамтран бичсэн бол ерөнхий продюсероор Ц.Анударь, ерөнхий найруулагчаар Г.Бямбасүрэн нар ажиллажээ. Харин энэхүү уран бүтээлийн гол дүрд Гавьяат жүжигчин У.Уранчимэг, реппер ThunderZ буюу Б.Өлзий-Учрал тоглосон байна. Энэ нь реппер ThunderZ-ийн гол дүрд нь тоглосон дэлгэцийн анхны уран бүтээл юм.
