“Дэлхийн Энхийн Их Наадам” ТББ, Дэлхийн Монголчуудын чуулган, Дэлхийн Энхтайвны зөвлөл, Монголын Уламжлалын академи зэрэг байгууллагуудын хамтран зохион байгуулж байгаа “PEACE AWARD 2013” ёслол хүндэтгэлийн ажиллагаа энэ сарын 23-ны өдөр буюу ирэх Пүрэв гарагт 18:00 цагаас Чингис зочид буудалд болох гэж байна.
Энэхүү ёслолын ажиллагаа нь гурав дахь жилдээ зохион байгуулагдаж байгаа бөгөөд Нийгэм, олон нийтийн дунд хүлээн зөвшөөрөгдсөн, нэр хүнд бүхий судлаач, эрдэмтэн, нийгмийн зүтгэлтнүүдээс шалгаруулж “ЭНХИЙН ШАГНАЛТАН”-ыг тодруулдаг уламжлалтай билээ. Уг шагнал нь “Дэлхийн Энхийн Их Наадам” ТББ-ын төдийгүй Монголын энхтайвны хөдөлгөөн, энхтайвны байгууллагуудын нэгдмэл үнэлэмжийг илэрхийлсэн хамгийн дээд шагнал юм.
Дээрх байгууллагуудаас “Энхийн шагналтан”-г шалгаруулахдаа Үндэсний хэмжээнд үйл ажиллагаа явуулж буй төрийн болон төрийн бус олон нийтийн байгууллага, эрдэм шинжилгээ болон боловсролын байгууллага, хувь хүний төлөөллийг хамруулдаг аж. 2011 онд тус шагналын анхны эзнээр Монгол улсын онц бөгөөд бүрэн эрхэт элчин сайд, СГЗ Д. Цахилгаан шалгарч байсан бол 2012 онд хоёр дахь шагналыг Төрийн соёрхолт, Ардын уран зохиолч Б. Лхагвасүрэн нар тус тус хүртэж байжээ. Монголын нэр нөлөө бүхий л томчуудыг нэгэн дор цугларуулж “ЭНХИЙН ШАГНАЛТАН”-г тодруулах уг наадам нэлээд өндөр зохион байгуулалттай болдог төдийгүй хамрах хүрээ өргөнтэйгөөрөө бусад шагнал гардуулах ёслолуудаас ялгардаг билээ.
www.URLAG.mn
