“Өгөгдсөн нөхцөл байдалд өөрийн хандлагыг сонгох нь бидний эдэлж болох хамгийн сүүлийн эрх чөлөө юм” -Виктор Франкл
“Амьдрал тэр чигээрээ сонголт” гэдэг үгтэй санал нийлдэггүй хүмүүс бий. Би ядуу аав ээжийг сонгож төрөөгүй, би муу найз нөхдийг сонгоогүй, би ууртай захиралтай ажлыг сонгоогүй гээд л…Тийм л дээ, та энэ бүх нөхцөл байдлыг өөрөө сонгоогүй. Гэхдээ ядаж л түүнд хандах хандлагаа өөрөө сонгож болох нь юутай азтай хэрэг вэ?
Гадаад нөхцөл байдлыг бид сонгож чадахгүй ч, дотоод нөхцөл байдлаа бид өөрсдөө сонгож болно. Уур бухимдлаа дийлдэггүй, муу бодол санаагаа удирдаж чаддаггүй хүн бол мэдрэмжээ сонгож чаддаггүй хүн гэсэн үг. Муу, сайн ямар ч явдал тохиолдсон түүнд хандах хандлагаа эерэгээр сонгож чаддаг хүн бол жинхэнээсээ биеэ даасан, өөрийнхөө толгойг өөрөө мэддэг хүн мөн юм.
“Өөрчилж чадахгүй зүйлийнхээ төлөө бүү шанал” гэсэн үг ч бий. Аль хэдийн бидний оролцоогүйгээр үүсчихсэн нөхцөл байдлаас болж бухимдахын оронд түүнд хандах хандлагаа эерэг болгох хэрэгтэй. Хүн өөрийгөө ямар газар байна гэж бодно, хүний сэтгэл санаа яг тийм газар байгаа юм шиг л мэдрэмжээр дүүрдэг. Харанхуй хонгил дунд байгаа хүн өөрийгөө “Би аймшигт газар байна” биш “Би амар амгалан, тайван газарт байна” гэж бодох юм бол сэтгэл санаа нь айдсаар биш, тогтуун тайван мэдрэмжээр дүүрнэ. Гадаад нөхцөл байдал ямар байхаас үл хамааран бид өөрсдийнхөө мэдрэмжийг сонгож болдог. Тиймээс зовлон шаналал ч тэр, аз жаргал ч тэр хоёулаа бидэнд зайлшгүй ирдэг хувь тавилан биш, бидний өөрсдийн сонголт юм.
Улаанбаатарын гудамжаар алхаж л явдаг миний зүс таних нэгэн бүсгүй байдаг юм. Түүнийг өнгөцхөн харвал уранхай, ноорхой хувцастай, ядруухан төрхтэй тэнүүлч нэгэн. Гэхдээ тэр яг загварын тайзан дээр яваа юм шиг л ихэмсэг сэхүүн алхдаг. Эргэн тойрных нь хүмүүс түүнийг шоолж байсан ч, тэр өөртөө хандах хандлагаа тэдний доог тохуугаар огтхон ч сэвтүүлэлгүйгээр хадгалж чаддаг. Түүний сэтгэл “Би гоо үзэсгэлэнтэй” гэсэн мэдрэмжээр дүүрэн байдаг. Тиймээс ч тэр нөхцөл байдлаасаа хамааралгүйгээр жаргалтай байж чаддаг гэдэг нь мэдрэгдэж байсан. Хүн өөрийгөө хэн гэж бодно, тэр хүн яг тийм л байдаг гэдэг үгний жишээ болсон бүсгүй бол тэр юм.
Ирэх долоо хоногт уурлахгүй байх, жаргалтай байх сонголтуудыг хийгээрэй!
