Монгол Улсын Хөдөлмөрийн баатар, Төрийн шагналт, Ардын уран зохиолч, Соёлын гавьяат зүтгэлтэн, төр, нийгмийн зүтгэлтэн, их соён гэгээрүүлэгч, яруу найрагч Бавуугийн Лхагвасүрэн агсны 1991 онд хэвлэгдэн олны хүртээл болж байсан “Ангир уураг” ном дахин хэвлэгдлээ. “Ангир уураг” номын хэвлэлийн редактороор Төрийн шагналт, Ардын уран зохиолч Д.Пүрэвдорж, уран сайхны редактороор Төрийн шагналт, Д.Нацагдоржийн шагналт зохиолч, Соёлын гавьяат зүтгэлтэн Ц.Доржготов ажиллаж байжээ.
Тус номыг “Бавуу брэнд”-ийн захиалгаар “Ганбилэг принтинг” ХХК-д дахин хэвлэсэн байна. “Ижий мөрөн”, “Тэр нэгэн бүсгүйд”, “Чамд хардуулах сайхан” зэрэг алдарт шүлгүүд тус номонд багтсан байдаг.
Энэхүү номын талаар Б.Лхагвасүрэн агсны ач хүү болох С.Хабул “Нийгэм хар бараан байхад бид соён гэгээрч, нэгнээ хайрлах, хүндлэх сэтгэлтэй байхад суралцъя” гэлээ.
Монголын ард түмний бишрэлийг төрүүлсэн их найрагч Б.Лхагвасүрэн ”Ангир уураг”, “Хос уянга”, “Гашуун өвс”, “Сул асгарсан сувд” зэрэг шүлгийн түүвэр, “Тамгагүй төр”, “Хүйтэн сэнтий”, “Атга нөж”, “Үгүйлэгдсэн хайр” “Галзуу гурвалжин” зэрэг олон арван жүжгийн болон уран сайхны кино зохиолууд, сонсогчдын сэтгэл зүрхэнд мөнхөрсөн нийтийн шилдэг олон дууны шүлгийг туурвиж байлаа.
