Улсын драмын эрдмийн театрын бүтээл, Монголын зохиолчдын эвлэлийн шагналт Б.Цогнэмэхийн зохиол, найруулагч Төрийн соёрхолт, Урлагийн гавьяат зүтгэлтэн Н.Наранбаатарын найруулга “Тэнгэрийн хүү” түүхэн туульсын жүжгийг Унгар улсын Будапешт хотын Үндэсний театрын тайзнаа ирэх дөрөвдүгээр сарын 25, 26-ны өдрүүдэд тоглоно.
Ингэхдээ дэлхийн театрын томоохон наадмуудын нэг болох 12 дахь удаагийн “МИТЕМ” фестивалийг “Тэнгэрийн хүү” жүжгээр нээх юм байна. Тус наадамд Турк, Болгар, Грек, Израиль, Румын, Мексик, Хятад, Япон, Итали, Франц зэрэг театруудын тоглолтуудаас гадна фестивалийн түүхэнд анх удаа Монгол Улсын уран бүтээлчид “Тэнгэрийн хүү” жүжгээрээ оролцох юм.
Түүнчлэн энэ онд Монгол Улс, Унгар Улсын хооронд дипломат харилцаа тогтоосны 75 жилийн ой тохиож буй. Энэхүү ойн хүрээнд Соёлын яамнаас санаачлан зохион байгуулж буй Монгол улсыг олон улсад сурталчлан таниулах “Go Mongolia” хөтөлбөрийн хүрээнд УДЭТ-ын хамт олон “МИТЕМ” наадамд оролцохоос гадна Унгар улсад ажиллаж, амьдарч байгаа Монголчууд болон Унгарын үзэгчдэд “Тэнгэрийн хүү” жүжгээ толилуулах аж.
