Би түүний сүүлчийн гуниг
Бишгүүрийн хөг мэт сүүлчийн дурлал
Бишүүрхээд буцсан хайр болоод хагацал
Биелээгүй мөрөөдлийн эхний цэг
Би түүний хавар болоод намар
Бичиглэж үлдээсэн төгс бус сонат
Бусдын өмнө өөртэйгээ хамт шатаасан
Булаахыг хүсээгуй гэрэл гэгээ нь
Би түүний үнэ цэнэ, хэмжүүр
Бийрийн үзүүрт тороогүй ихэмсэг зан
Өөрөөсөө харамлахдаа олны хөлд гээсэн
Өдлөөгуй шувуухай өмчлөөгүй сэтгэл нь
Би түүний . . .
Хаяж чадаагүй, авч бас болоогүй
Хамгийн сайхан зовлон
* * *
Халуун сэтгэлээ зориулсны чинь төлөө
Хардахдаа шаналсны чинь төлөө
Хаягдахдаа гуйгаагүйн чинь төлөө
Хатуужихдаа өмнө минь бөхийсний төлөө
Хамгийн үнэнч байсны чинь төлөө
Хайраасаа тэгээд урвасны чинь төлөө
Хайр сэтгэлээ чамд гэрээслэе
* * *
Дурлаад үхэж байна
Дусад дуслаар нэрсэн гунигтаа
Живж үхэж байна
Хайрлаад үхэж байна
Хар хараар нэрсэн шаналандаа
Хагдарч үхэж байна
Энэ дууг минь сонслоо гэвчиг
Эргэж бүү хар
Тунирхуу үгэнд минь хоргодож
Туулсан замаараа бүү алх
Учрахын жаргалыг даалгүй
Учраад, хагацахын зовлонг тэвчилгүй
Үхэж орхино, эргэж бүү ир
www.URLAG.mn
