Монголын зохиолчдын эвлэлийн шагналт, “Алтан гадас” одонт, зохиолч С.Батжаргалын “Хаан заяа” түүхэн романы нээлт өнгөрсөн бямба гараг /2026.09.12/-т боллоо.
Түүхийн гүнээс үндэсний ой санамж, төрт ёсны уламжлал, их хаадын түүхийг уран зохиолын хэлээр нээн өгүүлдэг зохиолч С.Батжаргалын хувьд энэхүү бүтээл нь 11 дэх уран бүтээл болж байгаа бөгөөд түүний туурвиж буй “Их хаадын удам” цувралын зургаа дахь роман юм.
“Хаан заяа” роман нь Монголын түүхийн ээдрээт цаг үе, их хаадын удам залгамжлал, хүний хувь заяа хийгээд төр улсын хувь тавилан хэрхэн огтлолцож ирснийг уран сайхны өргөн цар хүрээнд өгүүлэх бүтээл болжээ.
Номын нээлтийн арга хэмжээнд Монгол Улсын Төрийн соёрхолт, Соёлын гавьяат зүтгэлтэн С.Оюун, Соёлын гавьяат зүтгэлтэн, хөтлөгч Б.Дүгэрмаа, Соёлын гавьяат зүтгэлтэн Б.Шүүдэрцэцэг, Соёлын гавьяат зүтгэлтэн А.Цэгмид, Д.Хүү, Г.Баатарнум, Гавьяат зоотехникч А.Далхжав, “Болор цом”-ын эзэн М.Амархүү, Г.Лхагваа, Нацагдоржийн шагналт зохиолч Н.Мандал, Ж.Оюунцэцэг зэрэг утга зохиол, урлаг, соёлын салбарын нэр хүндтэй төлөөлөл хүрэлцэн ирж, зохиолч, шинэ бүтээлийн мэндэлсэн баярт мөчийг хуваалцлаа.
Номын нээлтийн үеэр зочид, уран бүтээлчид зохиолчийн олон жилийн туурвилын замнал, түүхэн сэдвийг уран зохиолоор дамжуулан хойч үед хүргэхийн үнэ цэн, “Их хаадын удам” цувралын онцлог, “Хаан заяа” романы уран сайхны ач холбогдлын талаар онцлон тэмдэглэв.
Түүх бол өнгөрсөн цагийн дурсамж төдий бус, өнөөдрийн биднийг бүтээж, маргаашийн замыг заах их сургамж билээ. Харин тэрхүү түүхийг уран зохиолын хэлээр дахин амилуулж, уншигчдын сэтгэлд хүргэн өгүүлэх нь зохиолчийн эрхэм үүрэг.
“Хаан заяа” роман чухамхүү энэ үнэ цэнийг өөртөө шингээн, Монголын түүхийн нэгэн шинэ хуудсыг уншигчдад дэлгэж байна.
