СУИС-ийг 2008 онд Урлагийн гавьяат зүтгэлтэн С.Сугарын удирдлагад төгссөн Н.Баярмаа сургуулиа төгсөөд гурван жил SBN телевизэд орчуулгын киноны дуу оруулагчаар ажиллаад, 2012 онд театрын босго давж, дагалдан жүжигчнээр хоёр жил ажиллаж, 2014 оноос үндсэн жүжигчнээр тайзнаас үзэгчидтэй уулзсан юм.
Уран бүтээлийн гараагаа дагалдан жүжигчин байхдаа Г.Ибсений “Нора” жүжгийн Норагаар эхэлж, үргэлжлүүлэн “Бардам туулай” жүжгийн Үнэг, “Эцсийн зогсоол зөвхөн чи” жүжгийн Женя Вилкомон, “Кихот ноён” жүжгийн Мореторнес, “Хэрээт төгөл” жүжгийн Виктория, “Жаргаагүй нар” жүжгийн Пагмадулам, “Ромео, Жульетта” жүжгийн хатагтай Капулетте, “Царцаа намжил” жүжгийн Согоо, “Би эндээс явахгүй” жүжгийн Дулмаа, “Оддын өвчин” жүжгийн Мария, “Тэнгэрийн хүү” жүжгийн Шагэ гүнж, “Анна Каренина” жүжгийн Анна Каренинагийн дүрийг тус тус бүтээгээд “улаан байшин”-гийн хаалгыг хаасан.
Өдгөө тэрбээр найруулагч А.Чингүний хамт “Монгол” хэмээх театр байгуулан байгуулан, уран бүтээлээ туурвиж буй. Тус театрынхаа анхны бүтээлээр Бернард Шоугийн “Цезарь, Клеопатра хоёр”, Уильям Шекспирийн “Антони. Клеопатра хоёр” жүжгийн зохиолоос сэдэвлэсэн “Клеопатра” жүжгийг сонгож, Н.Баярмаа тайзнаа Клеопатрагийн дүрээр гарсан юм. Харин хамгийн сүүлд тэрбээр “Suits” олон ангит кино болон “Эцэг” уран сайхны киногоор үзэгчидтэй дэлгэцээр уулзаад буй.
