“Алтан хальс” холбооноос долоо хоног бүрийн бямба гарагт зохион байгуулдаг “Мөрөөдөгчийн өдөр” кино өдөрлөгөөр энэ удаад С.Бямба найруулагчийн “Хүсэл шунал” баримтат киног толилуулахаар бэлдсэн байна.
Энэ үеэр С.Бямба найруулагч өөрийн биеэр хүрэлцэн ирэх бөгөөд түүний ВГИК-ийн сургалтын студи дээр 1996 онд хийсэн “Хүй богино” хэмжээний киног давхар гаргах аж.
"Хүний наймаа" киногоо орон нутгийн үзэгчдэд хүргэхээр зүүн аймгуудын нутгаар зорчсон Ж.Биндэр найруулагчийн аялал "Хүсэл шунал"-ын гол өгүүлэмж. Зам зуур С.Бямба найруулагч сайн андын хувьд түүнтэй аавынх нь тухай, Монголын кино урлаг, урлаг соёлын ирээдүйн тухай хууч хөөрнө. "Хүний мөр" киноны батлагдаагүй хэсэг, "Мандухай цэцэн хатан" киноны эвлүүлгээс хасагдсан кадр болон Д.Жигжидийн кино хальсанд үлдсэн сүүлчийн дүр төрх гээд ховор дүрс, бичлэг тэдний яриан дундуур зэрвэс үзэгдэнэ.
Гэхдээ энэ кино зөвхөн дурсамж дуртгалын тухай биш, нэгэн цагт байсан ч одоо оргүй алга болсон юмсыг гунигтайяа нэхэн санаж босгосон хөшөө баримал биш. Харин урлагийн мөнхийн шид, хүний сэтгэлд эгнэгт байх хүсэл, найдварын тухай гэхэд болно.
Уг кино Бусан, Тайван, Дубай, Гётебург, Тайланд, Сан Франциско, Монтеррей, Ром, Минск болон Тел-Авивын Олон Улсын Кино Наадмуудад шилэгдэн оролцож, 2011 онд “Азиатика” Италийн Ром хотын Азийн Олон Улсын Кино Наадмын Шилдэг Баримтат Кино, Мексикийн Монтеррейгийн Олон Улсын Кино Наадмын Шилдэг Баримтат Кино, 2010 онд Үндэсний урлагийн дээд шагнал ”Гоо Марал”, Тайваны Олон Улсын Кино Наадмын “Asia Vision” Гран При шагнал болон Бусаны Олон Улсын Кино наадмын Азийн Баримтат Киноны Холбооны шагналыг тус тус хүртэж байв.
“Хүсэл Шунал" киног энэ сарын 15-ны 14.00 цагт Энхтайван Найрамдлын Ордонд хүрэлцэн очиж үзээрэй.
www.URLAG.mn
