“Жийж” продакшны бүтээл “Цөвүүн цаг” түүхэн уран сайхны кино нээлтээ хийснээсээ хойш шуугиан дэгдээж, үзэгчдийг байлдан дагуулж, өчигдөр /2025.04.10/-ийн байдлаар 161,038 үзэгчдэд кинотеатраар хүрээд байна.
Харин энэ удаа тус уран бүтээлийн гол дүр болох Цэнд бүсгүйн дүрд тоглосон залуу жүжигчин М.Булганчимэгийг онцолъё.
М.Булганчимэг Ховд аймагт төрж, өсжээ. Ахлах сургуулиа Ховд аймгийн “Прогресс” сургуулийг төгссөн бөгөөд өдгөө СУИС-ийн Театрын урлагийн сургуулийн гуравдугаар дамжааны оюутан аж. Ардын жүжигчин С.Сарантуяагийн шавь. “Цөвүүн цаг” уран сайхны кино нь түүний тоглосон анхны уран бүтээл бөгөөд эл кинонд тоглох саналыг багшаасаа авсан байна. Дэлгэцийн уран бүтээлийн анхны гараагаа ийнхүү амжилттай тавьсан түүний гоо үзэсгэлэн, авьяас чадварыг үзэгчид шагшин магтсаар буй.
