“Тэнгэрийн хүү” жүжгийн бүрэлдэхүүн дэлхийн театрын төвүүдийн нэг Унгар улсын Үндэсний театрт тоглохоор очлоо.
Тодруулбал, MITEM (Madách International Theatre Meeting) буюу “Митем олон улсын театрын наадам” нь Унгарын Будапешт хотод жил бүр зохион байгуулагддаг, дэлхий дахины нэр хүндтэй театрын наадмуудын нэг юм. Энэхүү наадам нь 2014 оноос хойш Унгарын Үндэсний театраас санаачлан зохион байгуулж эхэлсэн бөгөөд өнөө жил 12 дахь удаагаа болох юм.
Эл театрын наадмыг Улсын драмын эрдмийн театрын бүтээл, Монголын зохиолчдын эвлэлийн шагналт Б.Цогнэмэхийн зохиол, найруулагч Төрийн соёрхолт, Урлагийн гавьяат зүтгэлтэн Н.Наранбаатарын найруулга “Тэнгэрийн хүү” түүхэн туульсын жүжгээр нээх бөгөөд Унгар улсын Будапешт хотын Үндэсний театрын тайзнаа 2025 оны дөрөвдүгээр сарын 25, 26-ны өдрүүдэд тоглоно.
2025 онд Монгол Улс, Унгар Улсын хооронд дипломат харилцаа тогтоосны 75 жилийн ой тохиож байгаа бөгөөд энэ хүрээнд “Тэнгэрийн хүү” жүжгийг “Go Mongolia” уриан дор тоглож, хоёр орны соёлын харилцааг өргөжүүлэхээр төлөвлөж байна.
