Монголын үндэсний музейн үзэсгэлэнгийн танхимд 2025 оны тавдугаар сарын 2-ны өдөр 11:40 цагаас “Үндэсний бичиг-Өв соёл” тусгай үзэсгэлэн нээнэ.
2003 онд Монгол Улсын Ерөнхийлөгчийн 105 тоот зарлиг гарч “Үндэсний бичиг соёлын өдөр”-ийг жил бүрийн тавдугаар сарын эхний ням гарагт тэмдэглэх уламжлал тогтсон билээ. Мөн монгол бичгийг төрийн албан ёсны бичиг болгох шат дараатай бодлогын хүрээнд, Монгол хэлний тухай хуулийн дагуу 2025 оны нэгдүгээр сараас эхлэн Төрийн албан хэргийг хос бичгээр хөтлөн явуулах болсон юм.
Монгол үндэстний түүх, соёлын баялаг өвийг хадгалан хамгаалах, түгээн дэлгэрүүлэх эрхэм үүрэг бүхий Монголын үндэсний музей нь “Үндэсний бичиг соёлын өдөр”-ийг тэмдэглэх ажлын хүрээнд монгол бичгээ сурталчлах, таниулах зорилгоор тус музейн сан хөмрөгийн цуглуулгад буй монголчуудын уламжлалт бичиг үсгийн түүх, хөгжил хувьслыг харуулсан “Үндэсний бичиг-Өв соёл” үзэсгэлэнг нийтэд толилуулж байна.
Үзэсгэлэнд Францын хаан Гоо Филиппт Ил хаан Өлзийтөөс илгээсэн захидал, Хар бухын балгаснаас илрүүлсэн үйсэн дээрх бичгүүд, монгол бичгээр туурвисан эртний ховор судар номнууд, бийр янтай, үнсэн самбар зэрэг бичгийн хэрэглэл, Манж ба Богд хаант Монгол Улсын тамга тэмдгүүд, 1920-1940-өөд оны үеийн ном, сурах бичиг, сонин сэтгүүл, нэрт монголч эрдэмтэн В.Котвичийг Судар бичгийн хүрээлэнгийн жинхэнэ гишүүнд өргөмжилсөн бичиг, Маршал Х.Чойбалсан, Ж.Самбуу тэргүүтэй төр засгийн удирдагчид, хөдөлмөрийн сайчуудад олгосон баярын бичиг, илэрхийлэлт, өргөмжлөлүүд, одон медалиуд, дээрээ монгол бичиг бүхий тамхины хайрцаг, цоож цуурганы зүйлс зэрэг нийт 100 гаруй эд өлгийн зүйлсийг дэлгэн харуулна.
Үзэсгэлэн 2025 оны тавдугаар сарын 2-12-ныг хүртэл Монголын Үндэсний музейн түр үзэсгэлэнгийн танхимд үргэлжилнэ.
