УДЭТ-ын уран бүтээлчид Нобелийн шагналт зохиолч Южин О’Нилийн “Хайлаас модны доор чамайг хүлээнэ” уянгын драмын жүжгийг Төрийн соёрхолт, Урлагийн гавьяат зүтгэлтэн Н.Наранбаатарын найруулгаар өнгөрсөн гуравдугаар сард толилуулж эхэлсэн. Жүжгийн гол дүрүүдэд жүжигчин О.Долгор, Т.Сэргэлэн, Гавьяат жүжигчин М.Түвшинхүү, Б.Баттогтох, Н.Мөнх-Эрдэнэ нар тоглосон юм.
Түүнчлэн тус жүжгийн хоёрдугаар бүрэлдэхүүн мөн тайзнаа гарч, жүжгийн гол дүр Абби Патнамд жүжигчин Д.Асардарь, Эбин Кэботод Т.Намсрай нар тоглох бол бусад дүр болох Эфрайм Кэботод Гавьяат жүжигчин М.Түвшинхүү, Симеон Кэботод Б.Баттогтох, Питер Кэботод Н.Мөнх-Эрдэнэ тоглосон.
Тэгвэл энэхүү уран бүтээлийг энэ тавдугаар сарын 16-наас дахин олны хүртээл болгох гэж байна.
Анх 1996 онд УДЭТ-ын тайзнаа “Тамын дурлал” нэртэйгээр үзэгчдэд хүрч байсан жүжгийг энэ удаа “Хайлаас модны доор чамайг хүлээнэ” нэртэйгээр толилуулж буй нь энэ бөгөөд жүжгийн ерөнхий найруулагчаар Төрийн шагналт, Урлагийн гавьяат зүтгэлтэн Н.Наранбаатар, ерөнхий зураачаар Урлагийн гавьяат зүтгэлтэн Т.Ганхуяг, бүжиг, хөдөлгөөний найруулагчаар Г.Ган-Очир ажилласан.
Эл зохиолыг Нобелийн шагналт, Америкийн жүжгийн зохиолч Южин О’Нил “Desire under the elms” нэртэйгээр 1924 онд бичсэн байдаг. Түүний зохиолуудад Грекийн эмгэнэлт жүжгийн хэв маяг, америк мөрөөдөл ба түүнийг тойрсон материализм, анги хоорондын ялгаа гүнзгий ажиглагддаг. “Хайлаас модны доор чамайг хүлээнэ” бол энэ бүгдийг шингээсэн, хөндөх санаа, агуулга тун өргөн бүхий бүтээл юм.
