Нийслэлийн Засаг дарга бөгөөд Улаанбаатар хотын Захирагчийн ивээл дор “Гэгээн Муза-18” олон улсын театрын наадмыг тавдугаар сарын 16-24-нд зохион байгуулна.
Наадмыг зохион байгуулах талаар өнөөдөр /2025.05.05/ “Гэгээн Муза” академи болон нийслэлийн Соёл урлагийн газраас хэвлэлийн бага хурал хийлээ. Энэ үеэр наадмын төрлүүдэд нэр дэвшсэн уран бүтээлчдэд гэрчилгээг нь гардуулж өгөв.
Тус наадмыг хоёр шаттай зохион байгуулах бөгөөд эхний шатны шалгаруулалт нь энэ сарын 16-22-ны өдрүүдэд нийслэлийн театруудад болох аж. Хамгийн сүүлийн шат буюу улаан хивсний ёслол энэ сарын 24-ний өдөр “Корпорейт центр”-т 17:00 цагт болно.
Мөн өнөө жил наадмын үеэр Дани улсаас ирсэн найруулагч “Физикл буюу биомеханик” сэдэвтэй сургалтыг зохион байгуулах юм байна.
Энэ жилийн наадмын хувьд Монгол Улсад хүүхдийн байгууллагын 100 жилийн ой тохиож буйтай холбогдуулан шинээр хүүхэлдэйн жүжгийн төрөл нэмэгдсэн аж.
