Жил бүрийн тавдугаар сарын эхний ням гарgгийг Үндэсний бичиг үсгийн баярын өдөр болгон тэмдэглэдэг уламжлалтай. Үүний хүрээнд Соёл, спорт, аялал, жуулчлалын яам болон Хүүхдийн төв номын сангийнхан хамтран “Төрөлх монгол хэл” уран бичлэгийн улсын уралдааныг 10 дахь жилдээ зохион байгуулж, шилдгүүдээ тодруулсан юм.
Үндэсний бахархал болсон монгол бичгийг хойч үедээ өвлүүлэн үлдээх, хүүхэд багачуудад цаашид суралцах сонирхол төрүүлэх, уран чадвар эзэмшүүлэх зорилготой эл уралдааны шилдгээр Говь-алтай аймгийн 12 дугаар ангийн сурагч С.Сүхбат шалгарчээ. Удаах байрт Дундговь аймгийн Сайнцагаан сумын “Цэгц билэг” сургуулийн 12б ангийн сурагч Дашням шалгарсан байна. Харин гуравдугаар байрт Хэнтий аймгийн Хэрлэн дөрөвдүгээр сургуулийн 12а ангийн сурагч Н.Чамин-эрдэнэ эрэмбэлэгдлээ.
10 дахь жилдээ зохион байгуулсан эл уралдаанд Увс, Баян-Өлгий, Ховд, Сэлэнгэ, Хөвсгөл, Хэнтий, Дорнод зэрэг аймгийн 80 орчим сурагч оролцжээ. Тэднээс хамгийн бяцхан нь 10 настай И.Эмүжин юм. Тэрбээр зургаан настайгаасаа монгол бичгээр бичиж сурсан бөгөөд уг наадамд дөрөв дэх жилдээ оролцлоо.
