Нийслэлийн Засаг дарга бөгөөд Улаанбаатар хотын захирагчийн ивээл дор, урлагийн олон төрөл зүйлийг жигд хөгжүүлж, иргэд, олон нийт болон гадаадын жуулчдад сурталчлан таниулах ажлыг нэмэгдүүлэх зорилгоор “Гэгээн Муза-18” олон улсын театрын наадмыг тавдугаар сарын 16-24-ний өдрүүдэд Улаанбаатар хотноо зохион байгуулж байна.
Энэ удаагийн наадамд Монгол, Уганда, Дани, Словяни, Япон, Румын Грек, Арабын Нэгдсэн Эмират, Тунис зэрэг улсуудын уран бүтээлчид оролцож байгаа бөгөөд наадмын зочин шүүгчээр Олон Улсын театрын институтийн ерөнхийлөгч, Уганда улсын иргэн Жессика Каава, Хонг Конгийн Театрын урлагийн сургуулийн багш, жүжгийн зохиолч Жанис Пуун, Япон Улсын Токио дахь “D’UOMA ex machine” театрын үүсгэн байгуулагч, найруулагч, судлаач Какумото Ацуши, Дани Улсын “Winter movement academy”-ийн үүсгэн байгуулагч, театрын хөдөлгөөний найруулагч, сургагч багш Денни Деннис, Олон улсын театрын институтийн гишүүн, жүжгийн зохиолч, театр судлаач Татъяана Азман нар урилгаар ирж ажиллаж байна.
Тус наадмын II шатны шалгаруулалтын дөрвөн төрөлд 21 номинацид өрсөлдөх дотоод болон гадаадын нийт 84 уран бүтээлчдийн тоглосон жүжгүүд 2025 оны тавдугаар сарын 16-22-ны өдрүүдэд УДБЭТ, Улсын хүүхэд залуучуудын театр, Улсын хүүхэлдэйн театр, РЦНК, “Сити” их сургууль, “Bee” театр, “Black box” театр, Тусгаар тогтнолын ордонд тус тус тоглогдох бөгөөд өчигдөр /2025.05.16/ “Орфей” театрын бүтээл “1984” постдрамын жүжгээр эхэллээ.
