Монгол Улсын Засгийн газрын 2024 оны 200 дугаар тогтоолоор Монголын төр, шашин, соёл урлагийн нэрт зүтгэлтэн Өндөр гэгээн Г.Занабазарын мэлмий гийсний 390 жилийн ойг 2025 онд тэмдэглэхээр шийдвэрлэсэн.
Энэхүү тэгш ойг тохиолдуулан Чингис хааны угсааны Монголын анхдугаар Богд Өндөр гэгээн Занабазарын Монголын нийгэм, шашин соёл, улс төрийн амьдралд гүйцэтгэсэн үүрэг, түүхэн байр суурь, үлдээсэн өв соёлыг нарийвчлан судлах, судалгааны шинэ эх хэрэглэгдэхүүнийг илрүүлэх, судлах, түгээн дэлгэрүүлэх зорилгоор тусгай үзэсгэлэн зохион байгуулна.
Мөн олон улсын эрдэм шинжилгээний хурлыг ирэх долоодугаар сарын 01-04-ний өдрүүдэд Улаанбаатар хотноо “Чингис хаан” үндэсний музейд зохион байгуулахаар төлөвлөжээ.
