Гавьяат жүжигчин У.Уранчимэг “Тамгагүй төр” жүжигт дахин тоглохгүй гэдгээ албан ёсоор мэдэгдлээ.
Тэрбээр цахим хуудсандаа
“Жүжигчин У.Уранчимэг миний бие “Тамгагүй төр” буюу “Монгол хаан” төслөөс албан ёсоор гарч байна.
Төрийн соёрхолт Б.Лхагвасүрэнгийн зохиол “Тамгагүй төр” жүжгийн Цэцэр хатан гээч шандас сорьсон сайхан дүр дээр гурван жилийн туршид чадан ядан ажиллажээ. Дүрийн сэтгэл зүй, үзэл бодол, деталь бүрийг сэтгэж бодож, хөдөлгөөн бүрийг дэглээч багш нартайгаа ярилцаж, тунгааж, сэтгэл зүрхээ өгч урлахыг хичээсэн. Энэ дүрийн мөн чанарыг үзэгчдэд хүргэхийн тулд өдөр бүр, тоглолтоос тоглолтонд сайжруулж, заримдаа өөртөө хэрээс хэтэрсэн шаардлагыг тавьдаг байлаа. Монгол жүжигчдийн ур чадвар, чанар чансааг дэлхийн ноён оргил болсон тайз тавцан дээр бахархалтайгаар харуулсан анхны үндсэн багын уран бүтээлч, жүжигчдээрээ бахархаад бахархаад ханашгүй билээ.
Г.Эрдэнэбилэг, С.Болд-Эрдэнэ, О.Дөлгөөн, Ш.Доржсүрэн, Б.Шинэбаяр та бүгдийн нөр их хөдөлмөр, хичээл зүтгэл, хөлс хүчээр уг жүжиг боссон юм шүү.
Монголынхоо Улсын драмын эрдмийн театрын тайзнаа 171 удаа монгол хэл дээр, есөн удаа англи хэл дээр, Англи улсын Лондон хотноо “Вэст Энд Колизиум” театрын тайзнаа 17 удаа монгол хэл дээр, Сингапурын “Марина Бэй Сандс” театрын тайзнаа 10 удаа монгол хэл дээр, хоёр удаа англи хэл дээр, нийт 207 удаагийн тоглолтыг мэргэжлийн стандарт дагуу алдаа мадаггүй хийж дуусгасан байна.
Миний хувьд одоо энд хүрээд өндөрлөж байна.
Дараа дараагийн тайз дэлгэцийн шинэ бүтээлээрээ үзэгч та бүхэнтэйгээ эргээд уулзах болно.
“Монгол хаан” жүжгийн цаашдын төлөвлөгөөт болон аялан тоглолтонд нь амжилт хүсье” хэмээн бичжээ.
