“Узбекистаны соёлын өдрүүд” гэрэл зургийн үзэсгэлэн болон урлагийн мастеруудын тоглолтыг УДБЭТ-ын тайзнаа өчигдөр толилууллаа.
Узбекистаны алдарт үндэсний хөгжмийн “Согдиана” чуулга тоглолтын хөтөлбөртөө “Би Монгол хүн”, “Монголын үнэртэй салхи”, “Сэрсэн тал”, “Жалам хар” зэрэг Монголын орчин цагийн хөгжмийн сор болсон бүтээлийг оруулсан нь онцлог байв.
ССАЖЗ-ын сайд Ч.Ундрам, “Энэхүү соёлын өдрүүдийн хүрээнд зохион байгуулж буй гэрэл зургийн үзэсгэлэн, үндэсний хоолны өдөрлөг, аялал жуулчлалын форум зэрэг үйл ажиллагаанд салбарын төлөөлөл болон олон нийт идэвхтэй хамрагдаж, хоёр орны ард түмний ойлголцол, нөхөрлөл улам батжиж байгаад бид сэтгэл хангалуун байна. Мөн Ташкентын Балетын сургуулийн монголын анхны оюутнууд болох Ардын жүжигчин О.Ганбаатар, Гавьяат жүжигчид Т.Туул, А.Навчаа, Д.Алтантуяа нарын 14 оюутан 1962 онд төгсөн ирж, эх орныхоо балетын салбарын хөгжилд онцгой хувь нэмэр оруулсан түүхтэй” хэмээв.
Энэхүү тоглолтыг Монгол Улсын Ерөнхийлөгч У.Хүрэлсүхийн урилгаар Бүгд Найрамдах Узбекистан Улсын Ерөнхийлөгч Шавкат Миромонович Мирзиёевын Монгол Улсад хэрэгжүүлэх төрийн айлчлалын хүрээнд толилуулсан юм.
