Дуурь, бүжгийн эрдмийн театрын уран бүтээлчид Ж.Бизегийн “Кармен” дуурийг шинэчлэн, эх хэлээр нь буюу Франц хэлээр тайзнаа шинэчлэн тавьсан билээ. Тэд энэ сарын 15-нд буюу өнөөдөр дахин “Кармен” дуурийг тайзнаа эгшиглүүлэх нь ээ. Тус дуурьт театрын залуу уран бүтээлчид гоцлож буйгаараа онцлог юм.
Энэхүү дуурийг ССАЖЯ-ны 2013 оны шинэ уран бүтээлийг дэмжих төсвийн үйл ажиллагааны хүрээнд шинэчлэн өнгөрсөн арванхоёрдугаар сард тайзнаа тавин үзэгчдийн хүртээл болгосон юм.
“Кармен” дуурийн гол дүрүүдэд буюу Карменд гоцлол дуучин Ц.Арюна анх удаа өнгөрсөн арванхоёрдугаар сард тайзнаа тоглосон юм. Тэрбээр мөн энэ удаад дахни гоцлох нь ээ. Дон Хозед тенор Д.Эрдэнэ-Очир, Микаэлад сопрано Б.Эрдэнэтуяа, Эскамильод буюу бухтай тулалдагчид баритон Э.Амартүвшин нар гоцлон хүүхдийн дүрүүдтэй хэсгийг ХБК-ийн сурагчдын найрал дуучдын бүрэлдэхүүнтэй, СУИС-ийн оюутны бүрэлдхүүнтэй, балетын жүжигчдийн гоцлол болон олны хэсгүүдтэй нилээд өргөн хэмжээнд толилуулах юм.
Тус уран бүтээлийн ерөнхий найруулагчаар Урлагийн гавьяат зүтгэлтэн Ж.Бүрэнбэх, ерөнхий удирдаачаар Ж.Бүрэнбэх, ерөнхий зураачаар Г.Ганбаатар нар ажиллажээ.
“Кармен” дуурийг анх 1984 онд Дуурь, бүжгийн эрдмийн театрын тайзнаа тоглож байсан түүхтэй юм. Дэлхийн шилдэг дууриудын нэг алдарт "Кармен" дуурийн шинэчилсэн тавилтыг дахин тольдох боломжтой боллоо.