“Хөх саран” уран сайхны кино DDish, Looktv, Univision-ээр үзэгчдийн хүртээл болж байна. Драм төрлийн эл киног Ө.Мөнх-Эрдэнэ найруулж, гол дүрд Б.Баяржавхлан, Б.Ариунцэцэг, Б.Ариунчимэг, Ч.Ганбаатар нар тогложээ.
“Тоонот” студийн артист, дуучин, жүжигчин Jason буюу Б.Баяржавхлан дунд ангийн сурагч ахуйдаа Дорноговь аймгийн “Саранхөхөө” театрт “Бөмбөлдэй баатрын домог” хүүхдийн жүжиг үзсэнээр жүжигчин болох хүсэлд хөтлөгджээ. Ингээд 2007 онд КУДС-д элсэж, 2011 онд төгссөн байна. Сургуулиа төгсөнгүүтээ УДЭТ-аас ажлын гараагаа эхэлж, таван жилийн хугацаанд тэрбээр “Тэнгэрийн хүү”, “Үгүйлэгдсэн хайр”, “Гамлет”, “Буруугүй буруутан”, “Уучлаарай, та дугаар андуурч”, “Өчигдөр” жүжигт тогложээ. Мөн “Манекан” жүжигт туслах найруулагчаар ажиллаж байв.
Тэрбээр долдугаар ангидаа анхны кинондоо тогложээ. Эл кино нь “Хотын охид” гэдэг нэртэй. Өнөөдрийг хүртэл Б.Баяржавхлан “Зэрлэг цэцэгсийн хүлэмж”, “Зүүдэнд ч оромгүй явдал”, “Өнөөдөр”, “Учрал”, “2000”, “Хүний цаана”, “Хиртээгүй сарнай”, “Дурсамж 2012”, “Сүүдрийн хот”, “Амьдралын урт замд”, “Чамтай учирснаас хойш”, “Зүрхэн зүг”, “Гүн тайгын манан” бүрэн хэмжээний уран сайхны кино, мөн “Тэгри чину”, “Хавтаст хэрэг”, “Хавтаст хэрэг-2” зэрэг олон ангит кинонд тогложээ.
