А.Ганчимэг гэхээсээ илүүтэй “Хэцүү анги”-ийн Зулаа нэрээр үзэгчдийн сэтгэлд хоногшсон эл бүсгүй СУИС-ийг төгсмөгцөө УДЭТ-аар “овоглож”, “Сарны цагаан цус” жүжгийн Ханаму бага хатан, “Оролмаа эх” жүжгийн бага охин, “Гамлет” жүжгийн Офелия, “Тэнгэрийн хүү” жүжгийн Шива хатан зэрэг дүрд тоглож байв. Улмаар “Хувьсал” продакшны “Зэрлэг цэцэгсийн хүлэмж”, “Зүрхээр наадагч”, “Атганд үлдсэн эрдэнэ” зэрэг уран бүтээлийн гол дүрээр үзэгчидтэй “уулзаж” байлаа.
Өдгөө тэрбээр Гавьяат жүжигчин, найруулагч Д.Ганцэцэгийн хамтаар “Аримун” продакшнаа толгойлон, амжилттай явна. Тус продакшн 2019 онд “Халуун зүрх”, 2023 онд “Хүний ээж” уран сайхны киногоо үзэгчдэд хүргэсэн. Олон улсын кино наадмуудаас шагнал хүртсэн эдгээр уран бүтээлүүдийн зохиолыг А.Ганчимэг бичсэний зэрэгцээ гол дүрийг нь бүтээсэн юм. Тэгвэл тэрбээр тун удахгүй буюу наймдугаар 8-наас “Номадиа” пикчерс, “Фалко” энтертайнментийн хамтын бүтээл “Гарц” олон ангит киноны хоёрдугаар бүлгийн гол дүрээр үзэгчидтэй “уулзах” гэж байна.
Тайзан дээр гялалзаж, дэлгэцэнд үзэгчдийг “уяж” чаддаг авьяаслаг, адтай уран бүтээлч бүсгүйд төрсөн өдрийн мэнд хүргэе.
