2025 оны зун Сэлэнгэ аймагт их хэмжээний ган гачиг болж, олон жилийн дунджаас хэд дахин бага хур тунадас орсон талаар нутгийн иргэд болон холбогдох байгууллагууд мэдээлж буй. Гангийн улмаас тариалангийн талбайн ургац багасч, гол мөрөн татарч, усны түвшин эрс буурч, ой хээрийн түймэр ихээр гарч байгаа билээ.
Харин энэхүү байгаль цаг уурын өөрчлөлт нэгэн түүхэн олдворыг ил гаргах нөхцөл болсон байна. Тодруулбал, 2025 оны долоодугаар сарын 25-ны өдөр Сэлэнгэ аймгийн нутаг дахь Хараа голын татарсан, гүехэн болсон хэсгээс эртний чулуун тээрмүүд олджээ.
Энэхүү олдвор нь нэн эртний үйлдвэрлэлийн хэрэглүүр байж болзошгүй бөгөөд тухайн бүс нутагт эрт цагт хүн суурьшиж, газар тариалан эрхэлж байсныг гэрчлэх соёл археологийн үнэ цэнтэй баримт болох магадлалтай юм.
