Олон улсын судлаачдаас бүрдэх баг 2000 жилийн турш Сибирийн мөнх цэвдэгт хадгалагдсан цогцсоос шивээснийх нь дүрсийг сэргээсэн байна. Тодруулбал, төмөр зэвсгийн үед амьдарч байсан эмэгтэйн шивээсийг технологийн тусламжтай сэргээсэн талаарх өгүүлэл “Antiquity” сэтгүүлд өнгөрсөн лхагва гараг /2025.08.06/-т нийтлэгдсэн нь олны анхаарал татаад буй.
Түүнчлэн шарилын 3D загварыг бүтээхийн тулд өндөр нарийвчлалтай хэт улаан туяа ашигласан бөгөөд тус муммиг Төв Азийн Алтайн нуруунаас олжээ. Энэ нь олон мянган жилийн өмнө тус бүс нутагт амьдарч байсан Пазырык хэмээх нүүдэлчдийн нэг байсныг баттай тогтоосон аж. Эл эмэгтэйн шарилтай цуг есөн морь тэрэг, хэд хэдэн гоёл чимэглэлийн хивс олдсон гэнэ.
ХБНГУ-ын Макс Планкийн геоантропологийн хүрээлэнгийн археологич, судалгааны багийн ахлагч Гино Каспари “Түүний арьс хэдийн харласан тул малтлагын үеэр шивээсийг ялган танихад хүндрэлтэй байсан ч гарын шуу хэсэгт бар, ирвэс, цаа буга дүрсэлснийг мэдсэн. Шивээснүүдийг ур чадварын хувьд ялгаатай хүмүүс хийсэн байх магадлалтай бөгөөд өнөө цагт ч ийм дүрслэл бүтээх амаргүй” гэжээ.
