1954 оноос хойш Франц улсын Канн хотноо жил бүр уламжлал болгон зохион байгуулдаг маркетинг, зар сурталчилгааны салбарын хамгийн том арга хэмжээ бол “Cannes Lions international festival of Creativity” юм.
Энэ жилийн фестиваль зургадугаар сарын 16-20-нд зохиогдсон бөгөөд дэлхийн шилдэг брэндүүд, маркетингийн захирлууд, медиа компаниуд гэхчлэн энэ салбарт үйл ажиллагаа явуулдаг 97 орны 12 мянга орчим хүн оролцжээ.
Өнөөгийн дэлхий ертөнц дээрх бүтээлч оюун тархинууд нэг дор цугларч, энэ жилийн трендийг хэрхэн тодорхойлж, аль сэдвийг онцлон илтгэл хэлэлцүүлж, ямар компанит ажил өрнүүлж, юуг кэйс болгон жишээлж бүтэн таван өдрийн турш чуулсныг сонирхож байна уу. Тэгвэл Монголын маркетингийн холбооныхон энэ тухай танилцуулахаар “Lions night Mongolia” арга хэмжээг албан ёсны эрхтэйгээр долоо дахь жилдээ зохион байгуулах гэж байна.
Энэ сарын 20-нд “Өргөө” кино театр, IMAX-д болох тус арга хэмжээний үеэр 2025 онд бүтээхүйн салбарын шилдгээр тодорч, шагнал хүртсэн олон улсын онцлох кампанит ажлууд болон сонирхолтой илтгэлүүдийг танилцуулах юм.
