Өмнөд Солонгосын уран бүтээлч G-Dragon “KRAFTON” компанийн “PUBG” болон “PUBG Mobile” тоглоомтой хамтран ажиллахаар боллоо. “PUBG: Battlegrounds” болон “PUBG Mobile” тоглоомд шинэлэг контент, арга хэмжээнүүдийг хамтран хэрэгжүүлэхээр болсноо зарлалаа.
Энэхүү хамтын ажиллагааны талаар анхны мэдээллийг G-Dragon-ы Лас-Вегаст болсон тоглолтын үеэр танилцуулсан бөгөөд энэ нь хөгжмийн болон тоглоомын ертөнцийг холбосон ээлжит томоохон төсөл болж байна. Уран бүтээлчийн хувьд энэ нь тоглоомын салбарт оролцож буй анхны ажил нь юм.
“KRAFTON”-ийн мэдээлснээр хамтын ажиллагааны хүрээнд 2025 оны есдүгээр сарын 19-нөөс эхлэн тусгай трейлер, тоглоом доторх шинэ контент болон урамшуулалт үйл ажиллагааг албан ёсны сувгуудаар цацах юм. Өмнөд Солонгосын реппер, дуучин Квон Жи Ён (G-Dragon) нь K-pop урлагийн түүхэн дэх хамгийн нөлөө бүхий уран бүтээлчдийн нэгээр нэрлэгддэг. Тэрбээр 2006 онд “BIGBANG” хамтлагийн ахлагчаар уран бүтээлийн гараагаа эхлүүлж, Солонгосын хөгжмийн соёлыг дэлхийд таниулахад чухал үүрэг гүйцэтгэсэн билээ.
Сүүлийн жилүүдэд “PUBG” тоглоом к-поп уран бүтээлчидтэй олон талын хамтын ажиллагааг өрнүүлж байна. Өнгөрсөн сард “KRAFTON” цахим спортын арга хэмжээнд зориулан виртуал хөвгүүдийн хамтлаг “PLAVE”, охидын хамтлаг “Aespa”-тай хамтарсан бөгөөд “PUBG Nations Cup”-ийн финалын үеэр “Aespa” тайзнаа тоглолтоо хийсэн юм.
Мөн өмнө нь “BabyMonster”, “BlackPink” хамтлагуудтай хамтарч байсан ч цахим спортын онцлогт чиглэсэн тусгай идэвхжүүлэлт хийгдээгүй байна.
