2025 оны IMD Дэлхийн авьяас, ур чадварын тайланд Монгол Улс 69 улсаас хамгийн сүүлд буюу 69 дүгээрт эрэмбэлэгдлээ. Тус судалгаа нь улс орнууд авьяаслаг боловсон хүчнээ хөгжүүлж, татах, хадгалах чадвар ямар түвшинд байгааг тодорхойлоход чиглэжээ.
Энэ жил Швейцар улс дахин нэгдүгээр байраа хадгалж, Люксембург хоёрдугаарт, Исланд гуравдугаарт жагслаа. Швейцар улс уг жагсаалтыг олон жил тэргүүлж буй нь боловсролын тогтолцоо, тогтвортой бодлого, институцын чадамж өндөр байгааг илтгэж байна.
Монгол Улс гурван үндсэн ангиллын дунджаар хамгийн бага оноо авч, ” хүний нөөцийг, ур чадварыг татах” бүлэгт хамгийн сүүлд жагссан байна.
Гэвч ажиллах хүчний өсөлт, сургалтад хамрагдаж буй ажиллагсдын хувь, боловсролд оруулж буй хөрөнгө оруулалтын хэмжээ, эмэгтэйчүүдийн хөдөлмөр эрхлэлт зэрэг үзүүлэлтээр өндөр оноо авчээ.
Харин амьдралын чанар, ур чадвартай удирдлага болон чадварлаг хүний нөөцийн олдоц, эрүүл мэндийн дэд бүтэц, ажиллагсдын урам зориг зэрэг үзүүлэлт хамгийн сул үнэлэгдсэн байна.
Авьяас ур чадварын индекс нь тухайн улс орны авьяаслаг хүнийн нөөцөө хөгжүүлэх, тэднийг дэмжихэд нөөц бололцоогоо хэрхэн дайчилж байгааг илэрхийлэх бөгөөд энэ нь улс орон хоорондын шууд өрсөлдөөн бус, харин хөгжлийн түвшнийг харуулдаг үзүүлэлт юм.
