Хятадын робот хөгжүүлэгч “AheadForm” компани хүний нүүрний хөдөлгөөнийг гайхалтай нарийн илэрхийлж чаддаг хүн төрхт роботын толгой танилцуулжээ. Тус компанийн гаргасан видео бичлэг сошиал сүлжээнд шуугиан тарьж, хэрэглэгчдийн анхаарлыг татаж байна.
Тус бичлэгт робот өрөөг тойруулан харан, гайхсан мэт царай гаргаж байгаа нь бараг бодит хүн мэт харагдаж байгааг үзүүлжээ. Түүний нүдний анивчих хөдөлгөөн хүртэл маш бодит мэт санагдаж, үзэгчдийг гайхшруулсан байна.
“AheadForm”-ийн мэдээлснээр тэдний бүтээл нь өөрөө суралцдаг хиймэл оюун ухааны алгоритм болон өргөн хүрээтэй бионик хөдөлгүүрийн технологийг хослуулснаар бодит мэт сэтгэл хөдлөл болон нүүрний илэрхийлэл гаргах боломжтой болсон аж.
“AheadForm” компани хэдийнээ “маш бодит мэт” хүн төрхт роботын цуврал бүтээсэн бөгөөд эдгээр нь хүрээлэн буй орчноо мэдэрч, харилцан ярилцаж, суралцаж, оюунлаг харилцан үйлдэл хийх чадвартай гэжээ.
