Жүжигчин Э.Алдар, Ц.Ганзориг нар “Ai production”-ыг үүсгэн байгуулж, продакшныхаа анхны уран бүтээл “Тэг цэг үйлдэл” уран сайхны киног бүх кинотеатраар үзэгчдийн хүртээл болгож байна. Тус уран бүтээлийн гол дүрд жүжигчин М.Төгөлдөр, С.Ариунбямба, У.Уянга нар тогложээ.
М.Төгөлдөр ОХУ-ын Кемерово хотын Соёл урлагийн их сургуульд Гавьяат жүжигчин Виктор Васильевич Мирошниченкогийн удирдлагад жүжигчний мэргэжил эзэмшжээ.
Их сургуулиа төгсөж Монголдоо ирмэгцээ Соёлын гавьяат зүтгэлтэн, жүжигчин, продюсер Г.Ундармаагийн үүсгэн байгуулсан “U stage” театрт Михаил Шолоховын “Дөлгөөн Дон”, Олжас Жанайдаровын “Дэрний сэтгэл” жүжигт тоглосон юм. Түүнчлэн тэрбээр “Probe” драмын дугуйлан хичээллүүлэхийн хажуугаар ОХУ-ын Саха улсын “Art Doydu” кино студийн “Legends of Olonkho land” уран сайхны кинонд тоглоод амжсан.
Хамгийн сүүлд тэрбээр “Pro” театрын бүтээл, Виктор ХЮГОгийн “Инээмтгий хүн” визуал драмын жүжгийн Хардкванон, Эрнст Теодор Амадей Гофманий “Цөмөөхэй ба хулганын хаан” үлгэрээс сэдэвлэсэн “Цөмөгч цэрэг ба хулганы хаан” хүүхдийн жүжгийн Дроссельмейер, Александр Дюмагийн “Шадар гурван цэрэг” физикл драмын жүжгийн Де Ришилье хамба зэрэг дүрээр тайзнаас үзэгчидтэй “уулзсан” юм.
