“Gangbay” хамтлагийн гишүүн, жүжигчин, реппер Baynaa буюу С.Баянмөнхийн төрсөн өдөр өнөөдөр /2025.10.14/ тохиож байна.
Тэрбээр уран бүтээлийн гараагаа СУИС-д хөгжимт театрын жүжигчнээр суралцах үедээ “Gangbay” хамтлагаа байгуулснаар эхэлжээ. Тус хамтлагийн “Тайл”, “Ганган цагаан”, “Seen”, “Моя” гэхчилэн “цацсан” дуу бүр нь хит болсныг залуус андахгүй. Анхны “Xalxstar” цомгоо 2020 онд, удаах цомгоо “Gilbee” хэмээн нэрлэж 2021 онд гаргаж байв.
С.Баянмөнх мэргэжлийн жүжигчин гэдгээ “Боловсрол суваг” телевизийн бэлтгэн хүргэдэг “Яг түүн шиг” шоунд амжилттай оролцож харуулсан. Тэрбээр 2022 онд реп мюзикл “Кассета” уран сайхны киног үзэгчдэд хүргэж, үргэлжлүүлэн найруулагч Ө.Мөнх-Эрдэнийн “Hacker”, “Fontanka” продакшны “Seasons of love”, “Аримун” продакшны “Хүний ээж”, “Orange” энтертайнментийн “Намайг ачсан дурлал” зэрэг уран сайхны киноны гол болон туслах дүрд тоглосон юм.
Харин тайзны уран бүтээлийн тухайд тэрбээр Урлагийн гавьяат зүтгэлтэн, хөгжмийн зохиолч Б.Бямбабаярын хөгжим, Урлагийн гавьяат зүтгэлтэн, найруулагч Ч.Ганхуягийн цомнол “Хязгааргүй” хип хопера мюзикл, “Pro” театрын бүтээл, Александр Дюмагийн “Шадар гурван цэрэг” физикл драмын жүжгийн Атосын дүрээр тайзнаа гараад буй.
