Гавьяат жүжигчин Ч.Сүхээгийн хүү, жүжигчин С.Ариунбямбыг эсрэг дүрийн баатар, энэ цаг үеийн даацтай дотортой уран бүтээлчдийн нэг гэдэгтэй хэн ч маргахгүй. Тэгвэл түүний охин А.Номин-Эрдэнэ өвөө, аавынхаа удмыг залган, авьяаслаг уран бүтээлч болж буй гэдгээ харуулж байна.
СУИС-ийг 2023 онд төгссөн тэрбээр Монголын “Search”, “Ганцхан шалтгаан”, “Сорил”, “Өвөөгийн хайр”, “Бэлчээр” зэрэг бүрэн хэмжээний кино, түүнчлэн Монгол, АНУ-ын хамтарсан “Shadow”, Монгол, Францын хамтарсан “Snow in September”, Монгол, Франц, Португалын хамтарсан “Cэр сэр салхи” уран сайхны кино, мөн Монгол, БНСУын хамтарсан “Suits” олон ангит кино, Монголын төр нийгмийн нэрт зүтгэлтэн Д.Пагмадуламын амьдралаас сэдэвлэсэн “Пагмадулам” уран сайхны кинонд тогложээ.
Өдгөө УДЭТ-аар овоглож буй тэрбээр өнгөрсөн оны намар үзэгчдийн хүртээл болсон Б.Цогнэмэхийн “Тэнгэрийн хүү” түүхэн туульсын жүжгийн Шива хатны дүрээр тайзнаас үзэгчидтэй уулзсан бол энэ удаа Оросын нэрт зохиолч Лев Толстойн “Анна Каренина” романаас сэдэвлэсэн ижил нэрт жүжигт Кити Щербацкаягийн дүрд тоглохоор болжээ.
