АНУ-ын алдарт nu-metal “Limp Bizkit” хамтлагийн аргил гитарчин Сэм Риверс 48 насандаа таалал төгссөнийг хамтлагийнхан нь өнгөрсөн ням гараг /2025.10.19/-т мэдэгдлээ.
“Limp Bizkit” хамтлагийнхан сошиал сүлжээндээ дараах мэдэгдлийг нийтэлсэн байна. Үүнд, “Өнөөдөр бид ах, хамтлагийн гишүүн, зүрхний цохилтоо алдлаа” гэсэн байна.
Үргэлжлүүлэн “Сэм Риверс бол зүгээр нэг бэйс хөгжимчин байгаагүй. Тэр бол цэвэр ид шид байсан. Тэр бол бүх дууны цохилт, эмх замбараагүй байдлын дунд орших амгалан, хөгжмийн маань сүнс байлаа. Хамт тоглосон эхний мөчөөс л Сэм дахин давтагдашгүй гэрэл, хэмнэлийг бидэнд авчирсан. Түүний авьяас шавхагдашгүй, оршихуй нь мартагдашгүй, зүрх нь асар уудам байсан” гэжээ.
Хамтлагийнхан мэдэгдлийнхээ төгсгөлд “Амар амгалан нойрсоорой, ах минь. Чиний хөгжим хэзээ ч зогсохгүй” хэмээсэн байна.
“Limp Bizkit” нь 1994 онд Флоридагийн Жэксонвилл хотод байгуулагдаж, 1990-ээд оны сүүлээр металл, хип-хоп, панк урсгалыг хослуулсан өвөрмөц хүнд хэмнэлтэй дуу хөгжмөөрөө алдаршсан хамтлаг юм. Тэд “Significant Other” (1999) болон “Chocolate Starfish and the Hot Dog Flavored Water” (2000) цомгуудаараа асар их амжилтад хүрч, АНУ-ын хөгжмийн жагсаалтыг тэргүүлж байв.
