.
АНУ-ын Сакраменто хотын ахлах сургуульд суралцаж буй монгол хүүхдүүдийн ТУС клубээс Улаанбаатар хотын Эх хүүхдийн эрүүл мэндийн Үндэсний төвийн Ерөнхий мэс заслын тасагт хэвтэн эмчлүүлж буй хүүхэд багачуудад Дэлхийн хүүхдийн сонгодог зохиолын ЭРДЭНЭСИЙН САН – 108 цувралаас 120 ном хандивлав.
Эдгээр номуудыг тус тасагт хэвтэн эмчлүүлж буй хүүхэд багачууд унших, асран халамжилж буй эцэг эх нь хүүхдүүддээ уншиж өгөх зорилгоор өгч байгаа ажээ. Ялангуяа удаан хугацаагаар нөхөн сэргээх эмчилгээ хийлгэж буй хүүхэд багачуудад эдгэрэн эрүүлжих урам зориг, сэтгэл санааны нэн чухал дэмжлэг болно гэдэгт итгэлтэй байна.
Сакраменто хотын ТУС клубын зохицуулагч Д.Баярсайхан "Манай клубынхан энэхүү хүүхдийн эмнэлэгт АНУ-аас байнга ном илгээж байсан ба энэ удаад хүүхдүүд маань эх хэлээрээ гарсан дэлхийн сонгодог бүтээлүүдтэй эмнэлэгт байх хугацаандаа танилцан уншвал тун сайн хэрэг болно гэдэгт итгэж байна" гэсэн юм.
Энэхүү TУC -"Team of Уouth Care" клуб нь АНУ-ын Калифорниа мужийн Сакраменто хотын ахлах сургуулиудад суралцаж буй монгол хүүхдүүдийн сайн дурын байгууллага юм.
Клубын монгол жаалууд маань 2013 оны зунаас эхлэн сар бүр нэг хайрцаг ном, заримдаа тоглоом, хувцас цуглуулан Улаанбаатар хотын Эх хүүхдийн эрүүл мэндийн Үндэсний төвд илгээж иржээ.
Сакраменто хотод аж төрж буй монгол эхчүүд маань үр хүүхдүүдээ хүний төлөө, бусдынхаа төлөө санаа тавьдаг, сайн сайхан үйл хэргийн үнэ цэнийг мэддэг хүмүүс болон хүмүүжээсэй гэдэг үүднээс энэхүү клубыг санаачлан байгуулжээ.
Хүүхдүүд маань ТУС клубынхээ зорилгыг монголд болон америкийн тус хэрэгтэй байгаа хүүхэд хөгшчүүлд туслах хэмээн тодорхойлсон байна. Мөн тус клубын хүүхдүүд өөрсдийгөө ахлах сургуулиа төгсөөд коллеж, их дээд сургуульд орох, ирээдүйдээ итгэлтэй, өөдрөг эрч хүчтэй хүн болж төлөвшихөд дэмжлэг болох чиглэлээр хэд хэдэн төсөл санаачлан хэрэгжүүлж байгаа юм байна.
“Тус” клубын хуудаснаас дэлгэрэнгүй мэдээлэл авна уу -https://www.facebook.com/tycclub
Клубын гишүүд – Энхсайхан, Оргилмаа, Ундраа, Отгоо, Уламаа, Номин, Дөлөө, Үлэмж.
Зураг дээр тус хандивыг Ерөнхий мэс заслын тасгийн даргын туслах Ш.Оюунбилэг хүлээн авч буй нь…
www.URLAG.mn
