“Надад ирээгүй хайр” олон ангит киногоор үзэгчдийн байлдан дагуулж буй жүжигчин Н.Нархажид гэж хэн бэ

“Номадиа” пикчерс, “Хүлэгү” пикчерсийн хамтын бүтээл “Надад ирээгүй хайр” олон ангит кино үзэгчдийн хүртээл болж буй. Оросын алдарт “И всё таки я люблю” цувралын зөвшөөрөлтэй монгол хувилбар болох энэхүү киноны гол дүрийг жүжигчин Н.Нархажид бүтээсэн юм.

Н.Нархажид 2016 онд Хөгжим бүжгийн коллежийг бүжгийн жүжигчин мэргэжлээр дүүргэж, 2021 онд СУИС-ийг М.Ариунжолоогийн удирдлагад жүжигчин мэргэжил эзэмшин төгсжээ.

СУИС-ийн оюутан ахуйдаа найруулагч Б.Чингүүний “Deja Vu” кинонд тоглож, сургуулиа төгсмөгцөө “OI” продакшны “No rules”, найруулагч Л.Таванбаярын “Үнэр”, “Боловсрол суваг” телевизийн “Хавтаст хэрэг”, “Ахан дүүс”, “VOO”-гийн “Чимээ үгүй”, “Black zebra” пикчерсийн “Дээд айл”, Д.Дашдолгорын “Чамтай учирснаас хойш”, О.Ууганбилэгийн “Сансула” зэрэг бүрэн хэмжээний болон олон ангит кинонд тогложээ.

Харин тайзны уран бүтээлийн тухайд Н.Нархажид Соёлын гавьяат зүтгэлтэн, жүжигчин, продюсер Г.Ундармаатай хамтран “Ангарагаас ирсэн эмэгтэй” жүжгийн гол дүрд 2022 онд тоглосон бол 2023 онд “Орфей” театрын бүтээл С.Жаргалсайханы “Шөнө дундын бүжиг” драмын жүжгийн гол дүрээр тайзнаа гарсан юм.