“Radiohead” хамтлаг 2017 онд Израилын Тел-Авив хотод тоглолт хийснийхээ төлөө олон нийтийн шүүмжлэлд өртсөн билээ. Тус хамтлагийн гоцлол дуучин Том Йорк Израилд ахиж хэзээ ч тоглолт хийхгүй гэж мэдэгджээ.
Израил болон Хамас бүлэглэл гал зогсоох хэлэлцээр хийхээс өмнө Их Британийн “The Sunday News” сонинд өгсөн ярилцлагадаа Том Йорк “Израилд яасан ч тоглолт хийхгүй. Би Нетаньяхугаар удирдуулсан Израил улсад 8,000 километрийн зайд ч ойртож очихыг хүсэхгүй байна. Гэхдээ манай хамтлагийн Жонни тэнд танил тал ихтэй” гэж хэлсэн байна. Жонни гэдэг нь “Radiohead” хамтлагийн гоцлол гитарчин Жонни Гринвуд юм.
Харин Жонни Гринвуд “Sunday Times” сонинд өгсөн ярилцлагадаа энэ талаар “Би хамтлагаа энэ явдалд хутгасандаа ичиж байна. Гэхдээ би араб, еврей дуучидтай хамтарч ажилласандаа ичихгүй. Энэ тал дээр уучлалт гуйхгүй” гэж мэдэгджээ.
“Radiohead” хамтлаг 2016-2018 онд хийсэн “A Moon Shaped Pool” аялан тоглолтынхаа үеэр Израилын Тел-Авив хотод тоглолт хийснийхээ төлөө хатуу шүүмжлэлд өртсөн. Өнгөрсөн жил Том Йорк Австрали улсын Мельбурн хотод ганцаарчилсан аялан тоглолтоо хийж байх үед Палестиныг дэмжигчид түүнийг эсэргүүцэж байсан тул Том Йорк дуулахаа болиод, тайзнаас буусан юм.
“Radiohead” хамтлаг аялан тоглолт хийлгүй долоон жил өнгөрсний дараа ирэх 11-12 дугаар сард Европ тивээр аялан тоглох гэж байна. “The Sunday Times” сонины сэтгүүлч Том Йоркоос “Палестиныг дэмжигчид танай аялан тоглолтыг эсэргүүцэж магадгүй гэж санаа зовж байна уу” гэж асуухад тэр “Та тоглоод байна уу” гэж хариулсан байна.
