Өнөөдөр жүжигчин М.Баярбатын төрсөн өдөр тохиож байна.
СУИС-ийн оюутан ахуйгаасаа “Boomtown” хамтлаг байгуулан уран бүтээлийн гараагаа эхэлж, хошин урлагийн хамтлаг, продакшнуудын тоглолтод оролцож, дэлгэцийн уран бүтээлүүдэд гол болон туслах дүрийг чадварлаг бүтээж явсан М.Баярбатыг өдгөө “Фантастик” продакшны жүжигчин гэдгээр нь үзэгчид эчнээ мэднэ.
Энэ онд 17 жилийнх ой нь тохиох “Фантастик” продакшндаа М.Баярбат “Дурсамж төгсгөл үгүй”, “Аз жаргалын шок”, “Миний ах атаман”, “Маш нууц”, “18 нас: Би чамд хайртай”, “Зүрхний хилэн”, “Маш нууц-2: Байтаг Богд”, “37 дугаар точка”, “Зура-3: Цэвэрлэгээ”, “Цөвүүн цаг” гэхчилэн уран бүтээлд, бусад продакшны “Хэцүү анги”, “Сүүлчийн бүжиг”, “Хар сувдны нууц”, “Хамтдаа”, “Том толгойтын романс”, “Хөтөч”, “Буруу өрөг”, “Хэн ч биш” зэрэг бүрэн хэмжээний болон олон ангит кинонд тогложээ. Хамгийн сүүлд тэрбээр Монгол, Унгар, Англи, Австрали уран бүтээлчид хамтран бүтээсэн, Бат хааны байлдан дагуулалтын талаар өгүүлсэн “1242: Gateway to the West” буюу “1242: Өрнөдийн босгон дээр” уран сайхны кинонд Цагаадайн ахмад хөвүүн Мүтүгэний хүү Бүри ноёны дүрд тоглосон нь өдгөө кинотеатруудаар гарч буй.
