Хүн хэдэн нас хүрч байж хөгширдөг юм бол оо? Хариултыг нь хэлье, “Би ч хөгширч дээ” гэж бодсон тэр өдрөөс эхлээд та хөгширдөг.
Дэлхийн хамгийн өндөр настай зохиолч Ким Хюн Сык хүний оюун санаа хэзээ ч хөгширдөггүй болохыг хүн төрөлхтөнд захиж байна.
1920 оны долдугаар сарын 6-нд төрсөн Ким энэ жил 105 нас хүрнэ. Ким дэлхийн хамгийн өндөр настай зохиолч гэсэн дээд амжилтын эзэн болж, ном бүтээлийн салбарт нэрээ мөнхлөн үлдээжээ. Ёнсэй их сургуулийн хүндэт профессор тэрбээр өнгөрсөн онд “Ким Хюн Сык – 100 жилийн мэргэн ухаан” номоо хэвлүүлснээр Гиннесийн амжилтад албан ёсоор бүртгэгдсэн. Тухайн үед тэр 104 нас арай хүрээгүй байв.
Тэгвэл Ким Хюн Сык энэ дээд амжилтаа дахин эвдлээ. Тэрбээр өнгөрсөн долоо хоногт хэвлэлийн бага хурал хийж, цоо шинэ номоо танилцуулав. “Ким Хюн Сук – 100 жилийн өв” нэртэй номдоо тэр өөрчлөлт хувьслаар дүүрэн бүтэн зууны турш хүн байхын утга учрыг өгүүлжээ.
Түүний анхны ном 50 ба түүнээс дээш насныханд зохимжтой боловч залуу хүмүүс ч өргөнөөр уншсан гэдгийг хэвлэлийн газар нь хэлж буй. Тиймээс хоёр дахь номоос нь ч залуучууд хүүхдүүд ямархан нэгийг олж харах болов уу гэж Ким Хюн Сык найдаж байна.
Ким Хюн Сыкын амьдрал Солонгосын түүхийн талаар хангалттай ихийг өгүүлнэ. Учир нь тэр Японы колончлолын үед Хойд Пёнган мужид төрж, тусгаар тогтнолын төлөө тэмцэгч Ан Чан Хогийн номлолоос урам зориг авч, яруу найрагч Юн Дон Жүтэй хамт суралцаж өсчээ. Түүгээр ч үл барам бага сургуульдаа Хойд Солонгосыг үндэслэгч Ким Ил Сунтэй хамт сурч, өглөөний цайгаа хувааж иддэг байсан гэдэг.
Бүх л төрлийн нийгмийг үзсэн Ким Хюн Сык “Эрх чөлөөг эрхэмлэдэг нийгэм л эцэстээ ялдаг” гэдгийг хэлж байна.
