Артхаус киног дэлгэрүүлэх зорилготой “Алтан хальс” холбооноос долоо хоног бүрийн бямба гаригт зохион байгуулдаг “Dreamers’day” буюу “Мөрөөдөгчдийн өдөр” кино өдөрлөгөөр энэ удаад Румыны найруулагч Кристиан Мунжиугийн 2007 оны Каннын кино наадмын дээд шагнал “Алтан далдуу мод” хүртсэн “4 сар, 3 долоо хоног, 2 өдөр” киног толилуулах гэж байна.
1987 оны Румын Улс. Их сургуулийн дотуур байрны хоёр эмэгтэй оюутан хаа нэг тийшээ явахаар зэхэх аж. Нэг нь буудал захиалсанаа утсаар ахин баталгаажуулах зэргээр их л хянамгай хандахаас үзэхэд тэд чухам “хаашаа” зорьж байгаа нь сонирхол татна.
Шугамын автобус, орон сууцны нэг ижил байрнууд зэрэг социалист орчнуудын нийтлэг дүр зураг, бидэнд ихээхэн танил гудамж талбай, барилга байшин дамжсаар хоёр охин буудалд ирнэ. Дунд насны эртэй буудалд уулзахаар товлосон аж. Тэд чухам “яах” гэж байгаа нь бүр л жигтэй.
Мэдээж уг бүтээл адал явдалт кино биш боловч дээрх хоёр асуултын хариу ил болоход аль ч нийгэмд байдаг хурц асуудлаар таны үзэл бодол, сэтгэлийг донслуулж мэдэх юм.
Цөөн байршилд зураг авч, бага зардал, цомхон бүрэлдэхүүнээр онцгой бүтээл туурвиж болохын жишээг харуулсан Кристиан Мунжиу найруулагч уг киногоороо дотоод, гадаадын 30 гаруй кино наадмаас шагналын буухиа таслалгүй явсаар Каннын кино наадмаас анх удаа Румын кино дээд шагналыг хүртсэн түүхэн явдлын эзэн болжээ.
Уг кино румын хэл дээр монгол хадмал орчуулгын хамт энэ сарын 26-ны бямба гаригт 14.00 цагт Энхтайван найрамдлын ордонд гарна. Тасалбарын үнэ 2000 төгрөг.
www.URLAG.mn