Төрийн соёрхолт яруу найрагч , төр нийгмийн зүтгэлтэн О.Дашбалбарын мэндэлсэний 57 жилийн ойд зориулсан “Эх орон оюун санаа” яруу найргийн наадам энэ жил түүний төрсөн нутаг Сүхбаатар аймагт амжилттай болж өндөрлөлөө. Дөрөв дэх жилдээ амжилттай зохион байгуулж буй уг наадмын хүрээнд "Эх орон-оюун санаа-яруу найраг" яруу найргийн наадам, "Наранбулаг-Миний бага эх орон" уран уншлагын наадам мөн “Зохиолч уншигчдын уулзалт” зохион байгуулсан бөгөөд “Uvertura” хамтлаг “Төгсөшгүй эхлэл” уран бүтээлийн тайлан тоглолтоо үнэ төлбөргүй өргөн барьж нутгийн зон олныг баярлуулсан байна.
Наадамд хот хөдөө, хөрш аймгуудийн I шатнаас шалгарсан 30 гаруй яруу найрагч өрсөлдсөнөөс I байрт Н.Минжинсайхан /Улаанбаатар/, Ай.Төмөр-Очир /Сүхбаатар/ тус шалгарсан бол II байрт Т.Дарханхөвсгөл /Улаанбаатар/, Ц.Оюундэлгэр /Сүхбаатар/ нар, III байрт Л.Лхагвасүрэн /Орхон аймаг/, Ч.Энхтөр /Говьсүмбэр аймаг/, тусгай байрт Н.Оюунтуяа /Сүхбаатар аймаг, Наран сум/ тус тус эзэлжээ. "Наранбулаг-Миний бага эх орон" уран уншлагын төрлийн сүүлийн шатанд 16 хүүхэд О.Дашбалбарын шүлгийг тайзан дээр уран яруу уншиж сургуулийн насныхнаас Баруун-Урт сумын дөрөвдүгээр сургуулийн 10 дугаар ангийн сурагч А.Наранбаяр, Баяндэлгэр сумын дунд сургуулийн наймдугаар ангийн сурагч Ө.Янжинлхам, цэцэрлэгийн насныхнаас Баруун-Урт сумын зургаадугаар цэцэрлэгийн З.Нандин-Эрдэнэ, долоодугаар цэцэрлэгийн Г.Түвшинбаярнар шалгарсан юм.
Мөн “Зохиолч уншигчдын уулзалт” зохион байгуулж Д.Нацагдоржийн болон МЗЭ-ийн шагналт яруу найрагч, “Болор цом”ын эзэн А.Эрдэнэ-Очир, шилдэг бүтээлийн “Алтан өд” наадмын удаа дараагийн шагналт, МЗЭ-ийн шагналт зохиолч, яруу найрагч, судлаач, хэл бичгийн ухааны доктор П.Батхуяг, МЗЭ-ийн шагналт яруу найрагч, МУСТА Д.Ган-Очир болон наадамд оролцсон бусад яруу найрагчид сүхбаатарчуудтай уран бүтээлээсээ танилцуужээ. Наадмыг яруу найрагчийн охин Д.Индра болон Сүхбаатар аймгийн Нийтийн номын сан хамтран зохион байгуулсан бөгөөд Дарьганга нутгийн зөвлөлийн дарга Т.Дорждэрэм нар зохион байгуулж, “New juulchin tours” ХХК ивээн тэтгэсэн байна.
Эх сурвалж http://www.info.mn
