Өнгөрч буй 2025 оны загварын ертөнцийг шуугиулсан нэгэн үйл явдал боллоо. БНСУ-ын “Blackpink” хамтлагийн дуучин Лиса “Met Gala 2026” ёслолын зохион байгуулах хорооны (host committee) бүрэлдэхүүнд оржээ. Загварын ертөнцийн хамгийн том үдэшлэгийн зохион байгуулагчдын эгнээнд анх удаа к-поп уран бүтээлч багтаж байгаа нь энэ. Өмнө нь солонгос дуучид зочноор л уригдаж байсан бол энэ удаад энэхүү том ёслолын зохион байгуулагч болж байна гэсэн үг. Олон шинжээч энэ үйл явдлыг Азийн уран бүтээлчдийн нэр хүнд өссөн, ази соёлын нөлөө нэмэгдсэнтэй холбон тайлбарлаж байна.
Жил бүр “Мет Гала” ёслолд хүрэлцэн ирсэн зочдын хувцаслалт, гоёл зүүсгэл загварын салбарт дурлагсдын ярианы сэдэв болдог билээ. Тэгвэл ирэх жилийн ёслолын сэдэв “Костюм Арт” болсон. Ирэх жилийн “Костюм Арт” үзэсгэлэн нь 2026 оны тавдугаар сарын 10-нд нээлтээ хийж, 2027 оны нэгдүгээр сарын 10 хүртэл үргэлжилнэ. Харин Мет Гала ёслол 2026 оны тавдугаар сарын 4-нд болохоор товлогджээ.
