Монголчууд бидэнд мартагдах дөхсөн хөгжмийн зэмсгүүдээр нэгэн шинэ цомгийг “BRO’S records”-ын уран бүтээлчид өнгөрсөн онд бүтээн хөгжимд дурлагсдад ертөнцийн анирыг сонордох боломжийг олгосон юм. Тиймдээ ч уг цомог 2013 оны шилдэг цомгоор шалгарсан юм.
“Ертөнц” цомог нь зөвхөн монголд төдийгүй дэлхийг хэрэн сүлжсэн цахим ертөнцөөр зэрэг түгэн монголын хөжгмийн урлагийн гайхамшгийг мэдрүүлсээр байгаа билээ.
“Ертөнц” төслийн ажил зөвхөн цомгийн ажлаар хязгаарлагдаагүй юм. “Ертөнц” төслийн хүрээнд монголын шилдэг хөгжимчдийг нэгтгэсэн “Дэлхий” хамтлаг байгуулагдсан бөгөөд тэд “Ертөнц” цомгийн аялгуунуудыг өнгөрсөн зуны турш жуулчдад сонирхуулан амьд тоглолтоороо бэлэг барьсан юм.
Мөн энэхүү амьд хөгжмсийн тоглолтоо тэд Монголын үзэсгэлэнт газруудын нэг болох Мэлхий хадны ойролцоо далайн түвшинээс 1800 метрийн өндөрт 100 метр орчим өндөртэй хадан уулан дээр байгалийн амьд мэдрэмжийн хамт бүтээсэн билээ. Амьд байгальд “Ертөнц” цомгийн хөгжмийг төслийн “Дэлхий” хамтлагийн уран бүтээлчид 17 төрлийн хөгжмийн зэмсгээр эгшиглүүлсэн.
Энэхүү бүтээл нь баримтат кино тоглолтын төрөлд хамрагдах бөгөөд онгон байгальд амьд хөгжмөө тоглож, түүнийгээ байгалийн дуу чимээтэй хослуулснаараа онцлог байлаа. Дэлхий хамтлагийн тоглолтын дуу дүрсийг шууд нэгэн зэрэг бичиж байгалийн акустикийг ашиглан дууны бичлэгийг найруулжээ.
Тоглолтын хөгжмийн зохиолчоор “Ертөнц” цомгийн зохиолч Г.Онон, продюсераар М.Болд, найруулагчаар П. Дэлгэрбаяр нар ажилласан юм. “Ертөнц” тоглолт нь 2014 оны нэгдүгээр сараас “Скаймедиа”-гаар гарч эхэлж байсан бол харин тавдугаар сарын 1-нээс буюу маргаашнаас эхлэн “Юнивишн”-ээр үзэгчдийн хүртээл болох нь ээ.
Г.Даша