Майкл Жорданы тансаг харшийг худалдаж авсан эр уг үл хөдлөх хөрөнгийг жуулчдад зориулсан гэр музей болгох төлөвлөгөөгөө танилцуулсан. Энэ шийдвэр нь хөршүүдийнх нь дунд шуугиан тарьж, олны дургүйцлийн бай болоод байна. Гэрийнх нь ойр орчимд таних танихгүй хүмүүс олноороо эргэлдэнэ гэдэг нь тэдэнд таалагдахгүй байгаа аж.
Небраска мужийн уугуул Жон Купер өнгөрсөн оны арванхоёрдугаар сард Хайланд Парк дахь харшийг ердөө 9.5 сая ам.доллараар худалдаж авсан. Тус харш нь есөн унтлагын өрөө, 19 угаалгын өрөөтэй. Худалдаж авснаасаа хойш тэрбээр үл хөдлөх хөрөнгийг орлогын эх үүсвэр болгохоор нэг бус удаа оролджээ. Энэ хүрээнд Майкл Жорданы байшинг “Airbnb” зориулалтаар хүртэл ашиглаж үзсэн аж.
Шинэ гаргасан төлөвлөгөөний дагуу Майкл Жорданы харшийг гэр музей болгосноор ойр орчмын бүс нутагт асар их ашиг тустай байх болно гэж тэр амлаж байна.
Купер байшинг анх худалдаж авсан цагаасаа л өөрөө амьдрахгүй, өвийг хамгаална гэж сэтгэл хөдлөм байдлаар амласаар иржээ. Тэрбээр өнгөрсөн хугацаанд байшинг янз бүрээр ашигласны эцэст энэ оны хоёрдугаар сард бүхэлд нь 230 мянган ам.доллараар түрээсийн зах зээлд гаргасан. Үүнийгээ “спортоор амьдарч, амьсгалдаг хүмүүст зориулагдсан цорын ганц боломж” гэж тодорхойлсон юм. Энэ санаа төдийлөн амжилт олоогүй тул өдгөө үл хөдлөхийн түрээсийн үнэ 89 мянган ам.доллар хүртлээ буураад байна.
