Алдарт жүжигчин Анжелина Жоли өнгөрөгч баасан гараг /2026.01.02/-т хүмүүнлэгийн айлчлалын хүрээнд Египет болон Газыг зурвасын хил Рафа боомтод зочилсон гэж түүний төлөөлөгчид мэдээлэв. Тэрбээр НҮБ-ын Дүрвэгсдийн агентлагийн тусгай элчээр ажиллаж байсан бөгөөд Газад тусламж хүргэх асуудлаар хүмүүнлэгийн байгууллагуудтай уулзжээ. Тэрбээр Израиль улс Газын зурваст ажиллаж буй 35 гаруй тусламжийн байгууллагын үйл ажиллагааг зогсоох болсонтой зэрэгцэн очсон байна. Израилийн зүгээс бүртгэлээ сунгаагүй байгууллагуудыг зогсооно гэж мэдэгдсэн бол тусламжийн байгууллагууд энэ шаардлага ажилтнуудын аюулгүй байдалд эрсдэл учруулж болзошгүй гэж анхааруулж байгаа юм.
Анжелина Жоли Рафад очсоныхоо дараа Газад оруулахыг зөвшөөрөөгүй, ихэнх нь эмнэлгийн хэрэгсэл бүхий тусламжийн бараа дүүрэн агуулахыг харсан гэж мэдэгджээ. Тэрбээр тусламжийн байгууллагууд хязгаарлалт, саад бэрхшээлийн улмаас тусламж хүргэхэд хүндрэлтэй байгааг онцолсон байна.
Олон улс Газын хүмүүнлэгийн нөхцөл байдал дордож, маш хүнд хэвээр байгааг анхааруулсан хэвээр байгаа юм. Мөн өвлийн хүйт орж, хүчтэй бороо, хүйтэн цаг агаар нь палестинчуудын нөхцөл байдлыг улам хүндрүүлж байна. Хүчтэй салхи, борооны улмаас олон палестинчуудын амьдарч байсан майхан эвдэрч, орон байр нурсан тохиолдлуудаас болж дор хаяж 20 хүн амь насаа алдсан гэж Газын эрх баригчид мэдээлжээ.
Айлчлалын үеэр Анжелина Жоли Египетийн “Red Crescent” болон бусад орон нутгийн тусламжийн байгууллагын ажилтнуудтай уулзаж, Газад илүү их тусламж хүргэх арга замын талаар ярилцсан байна. Тэрбээр гал зогсоох хэлэлцээрийг тогтвортой хадгалах, тусламж, шатахуун, эмнэлгийн хэрэгслийг Газад яаралтай, аюулгүйгээр нэвтрүүлэх шаардлагатайг онцолжээ. Мөн хүмүүнлэгийн ажилд оролцож буй сайн дурын ажилтнуудад талархал илэрхийлсэн байна. Түүнчлэн Анжелина Жоли Египетэд байгаа Палестин болон Суданы дүрвэгсдийн гэр бүлүүдтэй уулзаж байгаа гэж түүний албанаас мэдэгдсэн байна.
