Алдарт хөгжмийн зохиолч В.А.Моцартын хамгийн сүүлийн бүтээл “Увдист лимбэ” дуурийг УДБЭТ-ын уран бүтээлчид энэ сарын 24, 25-нд 17:00 цагаас толилуулах гэж байна.
Зохиолын сэдвийг Австрийн урлаг, нийгмийн нэрт зүтгэлтэн Э.Шиканедер нь К.Виландагийн 1786-1789 онд хэвлэгдэн гарсан “Жинистан буюу сайхан сэтгэлт хатагтай ба сүнснүүд” хэмээх уран зөгнөлт туульсын түүврээс авч, тухайн цаг үеийн ардын шидэт аман зохиолтой уялдуулан холбож чадсан юм. Цомнол анхнаасаа герман хэл дээр бичигдсэн бөгөөд үйл явдлууд, баатрууд бүгд нууцлаг ертөнцийг эрэгцүүлсэн маягтай, уран сэтгэмжийн аргаар бүтээгджээ. Үлгэрийн гэмээр энэхүү гэнэн сэдвийг В.А.Моцарт хөгжүүлэн хүний зан араншин, ёс суртахууны асуудлыг хөндсөн гүн гүнзгий философийн эрэгцүүлэл болгон хөгжим бичжээ.
Хоёр бүлэг, арван нэгэн үзэгдэлт “Увдист лимбэ” дуурийн анхны тоглолт нь 1791 оны есдүгээр сарын 30-нд Вена хотын “Ауф дер Виден”театрт даруухан болсон бөгөөд түүнээс хойш хоёр сарын дараа В.А.Моцарт тэнгэрт хальсан түүхтэй. Харин манай улсад 1993 онд анх удаа УДБЭТ-ын ерөнхий найруулагч Г.Эрдэнэбаатар “Увдист лимбэ” дуурийг найруулан тавьсан юм.
Уг дуурь нь Австрийн үндэсний уламжлалт хөгжмийн театрын “зиншпиль” хэмээх төрөл бөгөөд эх үндэс нь мөн л В.А.Моцартаас гаралтай аж. Хөгжимчид, дуучдын мэргэжлийн ур чадварыг илэрхийлэх техникийн боломжийг В.А.Моцартын шаардлагын дагуу хэвээр үлдээж тайз, декораци, хувцас чимэглэл, тавилтыг Монгол маягаар шийдсэн нь тухайн үедээ маш их шуугиан тарьж байсан ч В.А.Моцартын эх орны уран бүтээлчид гайхалтай сайхнаар хүлээн авч Азийн уран бүтээлчдийн сэтгэлгээний онцлогийг цохон тэмдэглэж байсан түүхтэй.
2000 оноос найруулагч Г.Эрдэнэбаатар эл дуурийг дахин шинэчилж тавихаар шийдсэн бөгөөд “Монголын дуурийг дэмжих Германы анд нөхдийн холбоо”-той хамтран үзэгчдэд дахин хүргэж эхэлжээ.
