Пистачо крем, нэг төрлийн самрын үйрмэг, Ойрх Дорнодын уламжлалт амттан кунафагаар дүүргэсэн Дубай шоколад өнгөрсөн онд дэлхий даяар алдаршиж, өндөр эрэлттэй байсан билээ. Тэгвэл үүнээс санаа авч бүтээгдсэн Дубай жигнэмэг өнөөдөр Өмнөд Солонгосын зах зээлийг байлдан дагуулж байна.
Уг бүтээгдэхүүний эрэлт маш өндөр байгаа тул гурилан бүтээгдэхүүн зардаггүй байсан ресторанууд хүртэл цэсэндээ нэмэх болжээ. Хэдийгээр жигнэмэг нэртэй боловч цагаан будааны бялуутай илүү төстэй энэ бүтээгдэхүүнд бас пистачо крем, кунафа, маршмаллоу зэрэг дүүргэгч ашигласан юм байна.
Өмнөд Солонгосын дэлгүүрүүдэд энэ бүтээгдэхүүн хэдхэн минутын дотор хэдэн зуугаараа зарагддаг болжээ. Одоогийн үнэ нь 5,000-10,000 воны хооронд хэлбэлзэж байгаа ч өндөр эрэлтийн улмаас цаашид өсөх магадлалтай байгаа гэнэ.
Өнгөрсөн оны есдүгээр сард “Ive” охидын хамтлагийн гишүүн Чан Вон Ён анх удаа Инстаграм хуудсандаа уг амттаны зургийг нийтэлснээр олны анхаарлын төвд орж байжээ. Өнөөдөр уг бүтээгдэхүүнийг дэлгүүрүүд, нарийн боовны газруудаас гадна ресторанууд, сүши баарууд, хүйтэн гоймонгийн газрууд хүртэл зардаг болсон байна. CU жижиглэн худалдааны сүлжээ аравдугаар сар Дубай жигнэмэг зарж эхэлсэн бол хэдхэн сарын дотор 1.8 сая ширхгийг борлуулжээ. “Манай үйлдвэрийн хүчин чадал зах зээлийн эрэлтийг хангаж дийлэхгүй байна” гэж тус компанийн төлөөлөгч саяхан Ёнхап агентлагт ярьсан байна.
Энэхүү амттанд дурласан нэг хүн борлуулж байгаа газрууд, тэдгээрийн нөөцийн хэмжээг бодит цаг дээр харуулдаг дижитал газрын зураг хүртэл бүтээжээ. Зарим дэлгүүрүүд нэг хүнд зарах дээд хэмжээг тогтоосон байна. Үүнийг дагаад хуурамч бүтээгдэхүүн үйлдвэрлэж, зарж борлуулах үзэгдэл ч гарч эхэлснийг Өмнөд Солонгосын хэвлэлүүд мэдээлжээ.
