Ховд аймгийн Ховд сумын нутагт, Торх улаан гэх ууланд нүүдэлчдийн булш, хиргисүүр, хөшөө дурсгал олон бий.
Торх улаан уулын хойд бэлд хоёр хүн чулуун хөшөө оршдог бөгөөд нутгийн иргэд үүнийг “Торх улааны хүн чулуун хөшөө” гэж нэрлэдэг. Эдгээр хүн чулуун хөшөөний нэг нь 323 см, нөгөө нь 279 см өндөр юм.
Газар хэвтэж буй хөшөөнд хүний нүүр, нүд, хамар, уруулыг тодорхой дүрсэлсэн бөгөөд хоёр мөрийг товойлгон сийлжээ. Гарыг цээж орчимд нийлүүлэн ямар нэг зүйл барьж буй байдлаар урласан байна. Гэсэн ч цаг хугацааны явцад эдгээр дүрслэл их хэмжээгээр баларч, бүдгэрсэн ажээ.
Дөрвөлжин хашлага чулуун байгууламж дотор босгосон хөшөөнд малгай, хүний нүүр, нүдийг арвай хэлбэртэй дүрсэлсэн байна. Мөн шулуун хамар, уруулыг тодорхой сийлж, гарыг цээж орчимд нийлүүлэн домбо хэлбэрийн сав барьж буй байдлаар урлажээ. Түүнчлэн хөшөөн доор нь сэлэм дүрсэлсэн байна.
Анх 2008 оны наймдугаар сард Ховд их сургууль, Монгол Алтай судлалын хүрээлэн, Томскийн их сургуулийн судлаачид Ховд, Эрдэнэбүрэн сумын нутагт археологийн хайгуул судалгаа хийх үеэр илрүүлжээ.
Ховд аймгийн Ховд сум нь Улаанбаатар хотоос ойролцоогоор 1500 км, аймгийн төвөөс 30 км зайд оршдог.
