Хятадын спортын хувцас үйлдвэрлэгч “Anta Sports Products” компани “Puma” брэндийн 29 орчим хувийг 1.5 тэрбум еврогоор худалдан авахаар тохиролцжээ.
Тодруулбал, “Anta” компани гэрээний дагуу “Puma”-гийн 43 сая орчим ширхэг хувьцааг Пиногийн гэр бүлийн “Artemis” хөрөнгө оруулалтын компаниас худалдан авч, компанийн дийлэнх хувьцааг эзэмшигч болно. “Anta” хувьцаа тутамд 35 евро төлөх бөгөөд энэ нь нэгдүгээр сарын 26-ны өдрийн Европын биржийн арилжаа хаагдах үеийн 21.63 евротой харьцуулахад 62 хувиар өндөр үнэ юм. “Puma” компанийн хувьцааг худалдах гэрээг 2026 оны эцэс гэхэд дуусгах төлөвтэй байна.
Дээрх мэдээлэл гарсны дараа Anta компанийн хувьцаа Хонконгийн биржид мягмар гарагт болсон арилжаагаар 3.4 хувиар өссөн нь 2025 оны 11 дүгээр сараас хойших хамгийн өндөр үзүүлэлт боллоо. Харин Германы бирж дээр “Puma” компанийн хувьцаа 21.2 хувиар өсөж, 26.21 еврогоор арилжаалагджээ.
Puma компанийн хувьцааг худалдан авах энэхүү хэлцэл нь тус брэндийг бүхэлд нь эзэмших замыг нээж магадгүй гэж шинжээчид үзэж байна. Харин “Anta” компани одоогоор ийм төлөвлөгөө байхгүй гэдгээ мэдэгджээ.
