2013 онд Франц улсын Бордо хотод болсон олон улсын хоршил хөгжимчдын 12 уралдаанд тэргүүн байр эзэлж эх орныхоо нэрийг гаргасан төгөлдөр хуурч Ц.Энхтөр, А.Энх-Амгалан нар дахин өөрсдийн уран бүтээлийн концертоо Монгол Улсын Филармонид энэ сарын 22-нд тоглох гэж байна. Тэд 2013 онд ДБЭТ-т “Piano Duo” нэртэй бие даасан хоршил концертоо амжилттай тоглож байсан юм.
Энэ удаад тэд Австрийн алдарт хөгжмийн зохиолч Ф.Шубертын 4 гарт зориулсан том зохиолуудын нэг “Fantasia” D940,Чех улсаас дэлхийд танигдсан алдарт хөгжмийн зохиолч А.Дворжакийн Legends op.59, Импресионизмын гол төлөөлөгчдийн нэг Францын алдарт хөгжмийн зохиолч К.Дебюсси “Petite Suite”, мөн 20-р зууны Францын төгөлдөр хуурч, хөгжмийн зохиолч Ф.Пуленкийн 4 гарт зориулсан соната тоглогдох юм байна.
Дуэт гэдэг нь хоёр хөгжимчин, дуучин, тоглогчид /performer/ зориулсан цомнол юм. Сонгодог хөгжимд төгөлдөр хуурчид болон дуучдын зохиолд ихэвчлэн энэхүү нэр томъёог хэрэглэдэг байна. Нэг зохиолыг 2 төгөлдөр хуурч хамтдаа нэг төгөлдөр хуур дээр тоглож байгааг “Төгөлдөр хуурын 4 гар” /piano 4 hands/ гэдэг бол 2 төгөлдөр хуур дээр хамт тоглож байгааг “Төгөлдөр хуурын хоршил”/Piano duet/ гэж нэрлэдэг.
Моцарт залуу байхдаа 1765 онд Лондон хотноо өөрийн зохиосон хоршилуудаар эгч Мария Анна-тай хамтран концерт тоглож байжээ. Тийнхүү Моцарт хоршил гэж юу вэ гэдгийг таниулахад тусалсан ба төгөлдөр хуурын хоршилын түүх ингэж эхэлсэн юм.
Тэрээр 4 гарт болон 2 төгөлдөр хуурт зориулсан олон соната, вариуцын цувралууд, концертууд зохиосон байдаг юм.
Анхны хоршилд зориулсан зохиол болон сонатууд 1777 онд хэвлэгджээ. Үүнээс хойш олон хөгжмийн зохиолчид энэхүү төрөлд зориулж зохиол бүтээл туурьвасан байдаг.
Төгөлдөр хуурч Ц.Энхтөр, А.Энх-Амгалан нар нь эх орондоо төдийгүй хилийн чанадад уран бүтээлээ хүргэж яваа уран бүтээлчид юм.
